Gnove scuvierte su la acuile di Beltram, simbul de Patrie: interviste ae diretore dal Museu dal Domo di Udin

Museu dal Domo di Udin, plaçute Bertrando, plantiere. Ben esponût pai visitadôrs al è il vessil dal patriarcje di Aquilee Beltram di Saint Geniès: une acuile zale voltade a man çampe e cu lis alis displeadis suntun fonts grîs celest. Ma ce savìno di chel che al è simbul cussì cjâr pal nestri Friûl? Chest al è il manufat tessil plui antîc che al ripuarte il steme dal Patriarcjât di Aquilee.
E al è chel origjinâl cusît tal cjamiç che al involuçave il cuarp dal Patriarcje Beltram, in cjarie dal 1334 al 1350. «O ai simpri sostignût che al podeve jessi posteriôr. La tipologjie dal ricam realizât, di un pont di viste storic e je plui confermade in epoche sucessive, fin Cinccent/inizi Sîscent» nus spieghe la diretore dal Museu Maria Beatrice Bertone. «Ma la cualitât dal taffetas di sede e je dal Tresinte. Ancje lis cusiduris a son contemporaniis dal cjamiç. O podìn duncje dî che nol è stât tornât a meti dopo, ma che al è chel origjinari». Bertone e je la custode di chest e di chei altris preziôs manufats conservâts te Catedrâl di Udin, che ju à protezûts salvantju dal degrât dal timp.
Par cui che al à plasê di tornâ a dâ dongje la storie di cheste nestre ricjece tessile al è a pene jessût il volum I Tessili dei Patriarchi. Paramenti sacri dal XIII al XX secolo nella Cattedrale di Santa Maria Annunziata scrit de diretore. Une altre maniere par cognossi miôr «un toc dal patrimoni dal nestri Friûl lassât dai patriarcjis, che a son stâts autôrs de nestre fede cristiane e de nestre identitât di popul cun pussibilitât di autoguvier» al à dit Pietro Fontanini, president de Provincie di Udin, ent che al à sostignût la publicazion dal libri. E pai furlans che no lu àn ancjemò fat, e merete duncje une visite al Museu, li che si cjatin no dome i tessii dal patriarcje (a ripuartâ la antighe acuile patriarcjâl a son ancje doi cjalçârs dal furniment funerari) ma, jenfri chês altris oparis, ancje la arcje di marmul dal beât Beltram e i afrescs di Vitale da Bologna, clamât a Udin dal patriarcje, che al segnarà une svolte pe piture furlane dai decenis daspò (www.cattedraleudine.it). ❚
✒ Natascia Gargano