Wikipedia

Mandi nono!
Mandi Bete!
Ce stâstu cjalant?
Un cine par television. No rivi a visâmi dulà che o ai bielzà viodût chel atôr li. Che al vedi fat Derrick?
Spiete dome un moment, nono: cumò lu cîr su Wikipedia.
Al vuiche ce?
Wikipedia, nono! E je une enciclopedie!
E cemût fasie a vuicâ une enciclopedie? Ise leade cu la cerniere des puartis?
No vuiche, nono! Si clame Wikipedia. E je une enciclopedie online: viodistu che le cjali tal telefonut?
E cemût fasie a stâ une enciclopedie dute tal telefonut? La mê e cjape dute une scansie de librarie grande!
Parcè cheee… bon, lasse pierdi. Dut câs, nuie: e je sierade. Mi jeri dismenteade che in chescj dîs e jere in siopar cuintri de gnove leç europeane che e podarès fâ sierâ dut il sît.
Po ben, se e je sierade, vierzile! O sêso masse usâts cun chei imprescj eletronics, cumò, che no savês nancje plui vierzi un libri?
Ma nono, ti ai a pene dite: e je une enciclopedie online! Tu vierzis lis pagjinis tal computer o tal telefonut, ma cuant che lis sierin no tu puedis viodilis!
Ah ben, cheste chi no le ai mai sintude. Ai miei timps a sioperavin i operaris, cualchi volte lis mestris, ma lis enciclopediis mai! E ce fasie, metie ducj i volums in place un daûr di chel altri?
Ma no, dome che e siere lis pagjinis par cualchi dì. Pecjât, nono: ti varès cjatât intun moment cui che al è chel atôr li.
Cemût? Intune enciclopedie? Un atôr? Ai miei timps, tes enciclopediis tu cjatavis robis di storie, di gjeografie, di sience, ma sigûr no di television!
Ma Wikipedia e je une robe diferente. Tu cjatis di dut, parcè che cui che al lei al pues ancje scrivi.
Oh, biele cheste! E ti fidistu di une enciclopedie dulà che cui che al vûl al scrîf?
E funzione cussì, nono, si clame “wiki” un sît internet dulà che cui che al à voie al pues zontâ il so contribût. E stant che ducj a puedin corezi chei altris, e ducj a àn di scrivi ancje dulà che àn cjapadis lis informazions, ae fin se cualchidun al fâs un erôr al salte fûr di sigûr.
E alore mi somee un non just, chel li, frute. Chel chi di lassâ scrivi a ducj mi pâr un sisteme che al vuiche di dutis lis bandis.

Bete di Spere