CE FÂ? Un timp… sui bancs di scuele

Bancs di len e zes ae lavagne, chescj a jerin i “compagns” di scuele dai nestris nonos o dai nestris gjenitôrs, cuant che la istruzion e jere une concuiste e no un dirit acuisît.
La esposizion Un timp… sui bancs di scuele al Museu Etnografic dal Friûl (Palaç Giacomelli, vie Graçan 1 a Udin) e ricostruìs un periodi de nestre storie midiant di documents origjinâi, materiâi didatics e ogjets di epoche.
I panei a contin dal disvilup des scuelis primariis udinesis publichis e privadis dal 1866, an de unificazion dal Friûl ae Italie, fin ai agns Cuarante dai Nûfcent, e dal procès complès di riorganizazion teritoriâl e di ricualificazion edilizie di chei decenis. La gjestion de istruzion publiche e passà des autoritâts eclesiastichis al setanteni di conduzion comunâl par rivâ,   propit intai agns Trente, al passaç ae statalizazion.
Dilunc de prime vuere mondiâl, une vore di edificis scolastics a forin recuisîts e doprâts tant che ospedâi militârs. E diviers a forin sdrumâts, cemût che al è sucedût pe frazion di S. Svualt. La part storiche de mostre si siere cul procès di fassistizazion, cjapant tant che riferiment la scuele elementâr di Cussignà.
Tes bachechis a son esponûts materiâi de epoche: dal furniment des aulis a chel dai arlêfs, dai documents scolastics (pagjelis, regjistris e ancje i cuaders dulà che si doprave la lenghe furlane e si studiave la culture dal teritori) ai libris unics di test.
La mostre, screade il prin di Setembar, si podarà visitâ fin ai 28 di Otubar, dal martars ae domenie, des 10 e mieze di matine aes 7 sot sere. Informazions al numar 335.1067518 ❚
Redazion