Mandi nono.
Mandi Bete! Âstu sintût di chel zovin che al è colât jù di parsore di un cuviert chê altre dì? Al è lât a finîle tal ospedâl.
Eh, sì, nono: si è fat mâl fasint parkour!
Ma no, no lu àn menât tal ospedâl pal cûr: al è colât jù dal cuviert!
O ai dite parkour, nono!
Il cûr al stave ben, ti dîs. A son i vues che si son rots! Al è sbrissât jù.
No “pal cûr”, nono. Parkour al è…
Inglês?
No, francês. Al è un sport.
E ce sport saressial, parsore di un cuviert? Fasino la gare di cui che al comede plui cops? O di cui che al nete miôr la gorne? O che al drece prime la antene?
No, a saltin.
Parsore di un cuviert?
Al è un pôc pericolôs, e je vere, ma aromai al è considerât un sport come chei altris.
O sai di sports che si fasin par tiere, ta la aghe, ma sui cuvierts no ju vevi mai sintûts.
Al è nassût tant che un sport di strade, in France: tu âs di fâ un percors, cun tancj ostacui tal mieç. E te strade, i zovins a zuiavin cui ostacui che a cjatavin, e dispès a lavin a saltâ parsore dai cuvierts.
Plui che un sport di strade, mi somee un sport di parsore de strade! Ma cemût funzionial?
No cognòs ben lis regulis. O sai che al è chest percors a ostacui e che tu âs di superâ i ostacui cun salts, rimpinadis, tombulis e robis cussì. A àn ancje un non, lis mossis, ma no lis sai ben. Al è il cat leap, par esempli.
Il cal… ce?
Leap.
O crodarai ben che ti vegnin i cai, a rimpinâti sù pai mûrs. Ma parcè clips?
Cat leap, nono. Lu clamin ancje arm jump: arm al vûl dî braç, e jump…
Il braç çamp! A son mats, chescj francês: no si contentin di rimpinâsi su pai cuvierts, lu fasin ancje cu la çampe!
Jump, nono… bon, lasse pierdi.
Bon, ma cui vincial in chest cangûr?
Parkour, nono…
Parkour, cangûr… cun ducj chei salts mi jeri confondût.
Dut câs, no ai capît se e vâl plui la velocitât tal fâ il percors o la agjilitât des mossis.
Mah. Mi someave miôr la mê idee di fâ la gare par comedâ lis gornis. Almancul tu stavis sul cuviert par fâ alc di bon.
Tu podaressis proponilu, nono!
Sì, ma cun elmet e imbragadure! Cui che al va suntun cuviert cence protezions e si met a saltâ, secont me, nol à un probleme tal cûr, ma tal cjâf ! ❚
Bete di Spere
