La globalizazion aromai e je un dât di fat: i mieçs di comunicazion, i marcjâts, lis informazions, i spostaments… a son in timp reâl; si sa su la brucje ce che al sucêt di chê altre bande dal globi. Baste une bugade di aiar economic par che dut il mont al reagjissi imediât. E alore, aial sens scombati pe proprie identitât? A cheste domande al rispuint pre Antoni in chest intervent fat dal 2002 e che o publichìn a pontadis. Si tratave di une conference regjistrade che o vin trascrit.
pre Roman Michelot
Aial sens intun mont globalizât esisti? Tignî dûr? Jessi se stes? Ve la Bibie. La prime domande che e fâs la Bibie: «Adam, dulà sêstu?». E je une grande domande. E je la identitât la prime domande de Bibie: dulà sêstu om, tu dulà sêstu a stâ, cui sêstu, cemût sêstu fat, ce storie âstu, ce culture âstu, ce lenghe âstu, ce difiets âstu, ce virtûts âstu? Duncje, al è impuartanton che ognidun di nô come persone, come popul, al ciri là che al è il so puest psicologjic, religjôs, filosofic, economic…
Al è impuartant savê cui che o soi jo, cui che e je la mê int, ricostruî la mê umanitât e la umanitât dal gno popul. «Adam, dulà sêstu?»: la prime domande, parcè che se al sparìs Adam, al sparìs l’om, se al sparìs l’om al reste pantan, no je plui une persone. La identitât: cuant che Diu al cree l’om, lu cree come persone, parcè che e je impuartante. Nol baste jessi, bisugne jessi come persone, come sogjet. Se jo o piert la identitât come persone e come popul o soi un mani di pale, o soi un picon in man di chei altris, o soi un sclâf, no soi plui nuie. Ma no mûr, o resti vîf par jessi sclâf, che al è ancjemò piês. Cualchi volte e je preferibile la muart. Il Vanzeli al dîs: «No stait a vê pôre di chei che a copin il cuarp, ma di chei che a copin la anime!». E gjavant la identitât ti copin la anime e ti lassin vivi come un mus, ti mandin in vuere, ti doprin cemût che ur smeche.
Ti lassin vivi parcè che a àn interès a fâti restâ vîf, ma tu âs finît di esisti, tu sês dome un ingranaç, un toc di un ingranaç infernâl. Duncje, al è impuartant vuê plui di simpri in chest mont che al mercifiche dut, che al dopre dut, cirî la mê identitât personâl e coletive. «Adam, dulà sêstu?». ❚
(4, al va indevant)
pre Antoni Beline
