Sfuei Mensîl Furlan Indipendent
Archivi de Patrie

Hosting

Bete di Spere

NO SON PERAULIS PAR VECJOS. Lis gnovis peraulis spiegadis ai nonos

Mandi nono!
Mandi Bete! Ce stâstu simpri a mateâ cun chel computer?
Al è pal gno blog. Mi stavi dismenteant di paiâ l’hosting!
Osti ce? Ce isal sucedût?
Che no lu vevi paiât!
Ma ce?
L’hosting!
No sta a rabiâti cun me, cumò!
Cui isal rabiât, nono?
E ce mût isal di rispuindi, alore? Ti ai dome domandât ce che tu âs di paiâ!
Ti lu ai dite bielzà: l’hosting!
No tu âs di paiâ un osti, ma ti sêstu dismenteade di paiâlu?
Ma no un osti, nono, l’hosting!
E ce osti isal chest Osti?
Al è il servizi che tu âs di comprâ cuant che tu fasis un sît internet. Tu pais une aziende che ti ten lis pagjinis intun server, cussì ducj chei che a van su internet a puedin viodilis.
Ce? Âstu di paiâ un par che ti tegni cualchi sfuei?
Ma no son sfueis, nono, a son pagjinis web!
Sfueis, pagjinis… no ti bastavie une cartelute, une scansie, cence lâ a paiâ un osti?
Cumò ti spieghi, nono: a son pagjinis eletronichis. Chei che mi ufrissin l’hosting a tegnin i dâts tal lôr server.
Ce ur servie?
No, “servie”, nono, il server! Al è une machine, une sorte di computer, che e ten dentri ducj i dâts, lis pagjinis eletronichis. Se tu lis tegnis dutis tal to computer, tu lis puedis viodi dome tu, invezit se tu lis metis su chei servers li, lis puedin viodi ducj.
Biele robe! Tu pais cualchidun par tignîti doi sfueis, e cun di plui chel ju fâs viodi a ducj!
Ma mighe di scuindon! O soi jo che o vuei che ducj a puedin viodi il gno sît, lei ce che o scrîf, cjalâ lis fotos!
Ai miei timps, frute, no jerin ducj Ai miei timps, frute, no jerin ducj chescj striaments. Vevistu voie di fâ savê a ducj alc che tu vevis fat? Tu lu disevis a Luise, ta la ostarie, e fate! No tu vevis sigûr di paiâle. Anzit, se chel che tu contavis al jere avonde interessant, ti ufrive un tai jê! Crodimi, frute, chel “hosting” mi somee propite un servizi dal osti. ❚
Bete di Spere

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +