Sfuei Mensîl Furlan Indipendent
Archivi de Patrie

NO SON PERAULIS PAR VECJOS. Googolare

Bete di Spere

Mandi Bete!

Mandi nono! Cemût sêstu vuê?

Ah, la vecjaie! O soi chi di vuê di matine a cirî di ricuardâmi une robe.

Ce robe, nono?

O ai di clamâ il spacecamin prime che al vegni l’Invier, par viodi de nape! Ma no mi visi plui il non di chel che al ven di solit. Al à di jessi il cusin dal nevôt de femine di Vigji, o forsit al jere il fradi de gnece dal copari dal fi di Agnul.

Âstu provât a googolâ?

Par gjavâmi di cjâf il pinsîr? Ma a mi mi covente pardabon un spacecamin, no soi dome preocupât pe memorie!

Par chel o dîs: âstu provât a googolâ?

E par fâ ce? Netâmi la nape cuntun maion?

Ce jentrial il maion?

E dopo, nol è che e sedi propit la mê ativitât preferide.

Ma cuale, nono?

Gucjâ! Lu faseve la none, no jo! Se propit o ai di fâ alc par passâ il timp e gjavâmi i pinsîrs, o voi te ostarie a zuiâ di briscule. E soredut, par netâ la nape a coventin i imprescj juscj, no dal sigûr un peçot di lane!

“Googolâ”, nono! No gucjâ! Al ven di “Google”.

Cudul?

Google, nono, un motôr di ricercje.

Ma ce varessio, di cjapâ sù la machine e di lâ a cirî un spacecamin cussì a câs?

Nissune machine, nono, al è dut dentri di un computer.

Il motôr?

Sì, nono: tu scrivis ce che tu stâs cirint e lui lu cjate. E stant che il motôr di ricercje plui famôs di ducj si clame “Google”, cirî su internet si dîs “googolâ”.

Mh… e a ce vadial?

Ce?

Chest Google. Vadial a nafte? Tu mi âs dite tu che al è un motôr! Isal eletric?

Ma no, nono! Si clame “motôr di ricercje”, ma nol è un motôr come che tu lu intindis tu! Lu clamin cussì parcè che tu tu i dâs il comant e lui al cîr di bessôl. Cjale, tal fâs viodi sul telefonut: tu tu scrivis “spazzacamino” e tu frachis chi. Tu spietis un moment… veju chi: ti tire fûr ducj i spacecamin chi ator.

Come un elenc telefonic?

Une robe dal gjenar, dome che tu puedis cirî di dut, cualsisedi robe che e sedi su Internet, no dome buteghis o artesans o personis cul telefon.

E al sa dut? Plui di Catine, chê de ostarie?

Al sa in pratiche dut, nono.

Fasimi viodi chescj spacecamin… Isal ancje il cusin dal nevôt de femine di Vigji?

Chel no lu sai, nono. Google no ti scrîf mighe ducj i parintâts!

Lu savevi jo! Alore disi al to “cudul” che prime di svantâsi di savê dut, al à di vignî chi a fâsi cuatri tais e a imparâ un pôc di chei plui vecjos!

pre Antoni Beline

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +