NO SON PERAULIS PAR VECJOS. Brunch

Mandi, nono!
Mandi, frute! Dulà vâstu?
Scusimi, nono, o soi di presse.
O ai di lâ a mangjâ cun dôs amiis.
Bielzà? A son undis di matine! Nancje lis gjalinis a gustin cussì adore! Cence ofese, eh.
Ma no: no lin propite a gustâ.
Al è un brunch.
Il granç? Bon lui! Ancje se mi plasin plui lis masanetis. Però, che tu mangjis granç o luianie, gustâ a lis undis mi somee masse adore istès.
Un brunch, nono! Brunch, cun la B. Al è…
…inglês.
Juste, nono, brâf.
Eh, aromai o ai imparât.
Al è inglês e al nas di “breakfast”, che al vûl dî gulizion, e “lunch”, che al vûl dî gustâ. Velu: il brunch e je une vie di mieç tra gulizion e gustâ.
E cemût si fasie cheste vie di mieç? Tocjistu i biscots te mignestre?
Ma no, tu puedis mangjâ tantis robis, soredut americanis: pancakes, tortis saladis, ûfs strapaçâts cul bacon.
Cun ce?
Il bacon, la panzete!
Ah, benon! Ancje il purcit aial un non forest, cumò? E sintìn: ce si bevial a chest brunch, cafè e lat come a gulizion o aghe e vin come a gustâ?
Ni un ni chel altri. Tu puedis bevi un struc di naranç, une centrifughe…
Une centrifughe? Ma ce isal, un ristorant o une lavandarie? Sta atente che no ti metin ancje la varechine dentri!
Ma mighe la centrifughe de laveblancjarie! Al è un imprest par gjavâ fûr il struc di pomis e verdure. Par esempli, îr o ai bevude une centrifughe di miluç e selino.
Il selino di bevi? Ma parcè no lu metistu te mignestre come ducj, il selino?
Tu varessis di provâlu, nono!
Al è bon!
Cjale, no mi lassi insegnâ nuie dai americans, jo. Sigûr no a mangjâ. Ancje i furlans a son bogns di mangjâ a cualsisedi ore dal dì, dome che no i àn dât un non: si clame dome “pan e salam”. Ma se tu âs voie, o stin pôc. Fasìno une vie di mieç tra gulizion e gustâ? Clamìnle gulistâ. Vadial ben?
Clame lis to amiis a “gulistâ”, cumò, e viodìn di mangjâ purcit cuntun non di purcit! ❚
✒ Bete Di Spere