Intant che in Italie i citadins si preparin a esprimi al referendum dai 4 di Dicembar la proprie opinion su la riforme costituzionâl Renzi-Boschi, in Slovenie a son pronts a celebrâ il XXV aniversari de prime costituzion de Slovenie indipendente. Di fat, ai 23 di Dicembar dal 1991 la assemblee de Republiche di Slovenie e à aprovade la leç fondamentâl dal stât sloven. La costituzion e conten 174 articui, dividûts in dîs cjapitui: disposizions gjenerâls, dirits umans e libertâts fondamentâls, relazions economichis e sociâls, organizazion dal stât, autonomie, financis publichis, costituzionalitât e legalitât, cort costituzionâl, procedure pes modificazions costituzionâls, disposizions transitoriis e finâls.
Te Costituzion e je previodude za la tutele des minorancis. Di fat, l’articul 5, che al fâs part des disposizions gjenerâls, al garantìs i dirits des comunitâts nazionâls taliane e ongjarese e al previôt che il stât sloven si interessi des comunitâts autoctonis slovenis intai stâts confinants, dai emigrâts slovens e dai slovens intal mont, facilitant i rapuarts cu la patrie. I slovens che no disponin de citadinance slovene a puedin gjoldi in Slovenie di dirits e di facilitazions particolârs.
L’articul 11 al declare invezit ancje il talian e l’ongjarês tant che lenghis uficiâls dal stât intai teritoris dulà che a stan lis dôs comunitâts nazionâls minoritariis. L’articul 14 al garantìs la avualance dai citadins cence tignî cont de nazionalitât, raze, ses, lenghe, religjon, convinzion politiche o di altri gjenar, stât patrimoniâl, nassite, istruzion, stât sociâl e invaliditât (cheste ultime cundizion e je stade metude dome intal 2004) e cualsisedi altre cundizion personâl.
L’articul 61 al garantìs il dirit di manifestâ in libertât la apartignince ae proprie nazion o comunitât nazionâl, e l’articul 62 al fisse il dirit di doprâ la proprie lenghe intai rapuarts cu la aministrazion publiche, intai mûts definîts de leç. L’articul 64 al è invezit dedicât dal dut aes comunitâts taliane e ongjarese e al definìs dute une serie di dirits particolârs. Tra chescj, al è il dirit a podê gjoldi dai mieçs di comunicazion inte proprie lenghe e il dirit ae istruzion inte stesse (che e previôt ancje la definizion dal teritori là che la istruzion bilengâl e à di jessi obligatorie). Intai teritoris dulà che a stan, lis minorancis a formin lis propriis comunitâts autogjestidis e a àn il dirit a jessi rapresentadis in parlament e in chei altris orghins eletîfs des aministrazions locâls.
I dirits des comunitâts ongjarese e taliane no dipendin dal numar dai lôr membris, cun di plui lis leçs e chês altris disposizions che a rivuardin i lôr dirits costituzionâi no puedin jessi cambiadis o aprovadis cence il consens dai rapresentants di chês comunitâts. L’articul 65 al previôt ancje la definizion di dirits particolârs pe comunitât rom. Lis comunitâts nazionâls des ex republichis jugoslavis, cussì come la comunitât gjermanofone, no son ricognossudis uficialmentri tant che minorancis de costituzion e par lôr a valin disposizions diviersis. Cualchidun dai lôr rapresentants al à domandât che ur fos ricognossût in maniere costituzionâl il status di minorance, ma a vuê no si è rivâts ancjemò a un acuardi in chest sens.
In chescj 25 agns la Costituzion slovene e à vût modificazions o zontis plui voltis. Chest al è sucedût soredut intal procès di svicinament ae Union Europeane e ae Nato, e plui di resint, par esempli cul inseriment de regule de pate di belanç intal 2013. Cualchi modificazion e je stade fate sui referendums cu la introduzion di un quorum dal 20%, no su la afluence ma leât al numar di chei che a àn di esprimi un vôt contrari par fâ anulâ une leç (clarementri, intal câs che al prevali il no). Il parlament al è elet cuntun mandât di 4 agns e al è formât di 90 membris che, tra chei, doi a rapresentin la comunitât taliane e ongjarese e a vegnin elets in maniere separade. Dopo de aprovazion de costituzion a son stadis introdotis disposizions buinis di garantî la pâr oportunitât di gjenar midiant cuotis prefissadis, un sisteme eletorâl proporzionâl cun soiâr di bariere al 4% e basât su lis preferencis.
Tal moment che in Friûl-Vignesie Julie (e in dute Italie, se al referendum al vinç il sì), a vegnin eliminadis lis provinciis, al è interessant notâ che la Slovenie e à previodût intal 2006 la lôr istituzion, ma cence mai realizâ cheste disposizion. ❚
Tjaša Gruden
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +
Gnovis / Ae presentazions dal libri “Feminis furlanis fuartis”, cetant public! Graziis
Redazion
Te seste edizion de rasegne “Quando le Donne” curade da la Aministrazion Comunâl di Romans, cu la autore, Walter Tomada, diretôr de “La Patrie dal Friûl”. A Cormons ur daran acet i Amîs da Mont Quarine, cu la autore a son intervignûde Roberta Nunin, professoresse ordenarie di Dirit dal lavôr ae Universitât di Triest, e Carlotta Del Bianco, […] lei di plui +
Rassegne stampe / Articul dal Messaggero Veneto dai 15-3-2024 su la presentazion dal nestri libri “Feminis Furlanis Fuartis” di Erika Adami
RedazionL'EDITORIAL / Preâ par furlan al è onôr e no pecjât
Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +
Gnovis / Acuile sportive furlane
Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +