Sfuei Mensîl Furlan Indipendent
Archivi de Patrie

Black friday

Bete di Spere

Mandi nono.

Mandi frute! Ce biel gaban che tu âs!

Biel? Al è vecjo di cuant che ancjemò no jeri maridade! Cjale chi: al è dut fruiât.

Pecjât, ti stave ben!

Eh, lu sai: par chel o fâs fadie a butâlu. O varès di comprânt un gnûf, ma aromai o spieti il Black Friday.

Dîs po, frute, no tu varâs mighe bisugne di bêçs? Cjale che tu puedis dîmal se ti covente alc. O soi chi par judâti, ricuardital.

Parcè dîstu cussì, po, nono?

Par chê robe li, dal blec frait… no mi somee une biele robe.

Ma no, nono, aromai al mancje pôc. Parcè varessio di butâ vie bêçs cuant che o pues spietâ la fin di Novembar e cjoli alc cul scont al Black Friday?

Tu mi fasis pôre, piçule. Tu âs une gabane fruiade e invezit di butâle vie tu le comedis cuntun blec, cun di plui frait, e tu âs ancje di spietâ che lu metin in ufierte!

Ma nono, jo no ai mai fevelât di blecs o di robe fraide!

Cemût no? Tu âs fevelât tu di chel blec frait!

Ah! Il Black Friday, nono!

E ce bestie ise?

E je une dì dulà che a fasin ufiertis dapardut.

No saraie une freadure?

No, e je come la stagjon des licuidazions, nome che e dure une dì e vonde.

E ce licuidazion ise a Novembar? Une volte lis fasevin a Zenâr.

E je une tradizion americane. “Black Friday” al vûl dî “vinars neri”.

Neri parcè che al plûf?

No! Par dîle juste no si sa ben parcè che lu clamin neri, ma al è il vinars dopo de fieste dal Ringraciament.

E ce fasino, ringraciino prime di vê i sconts? No mi somee masse logjic. Al è come folâ la ue prime di vendemâ.

Ma no, nono, la fieste dal Ringraciament e je une des fiestis plui impuartantis in Americhe. Forsit plui dal Nadâl. E dopo al ven chest Black Friday e ducj i negozis a fasin dai super sconts. La int si met in code ancje de gnot prime par cjapâ lis ufiertis miôr.

Robis di no crodi. Ma sono mats? Jo o preferìs i “vinars neri” a la furlane.

E cemût sono, nono?

Tu vâs in ostarie e tu cjolis un tai di Merlot! Se tu preferissis il Tocai, tu fasis il vinars blanc. No tu âs di fâ code e tu puedis ringraciâ dopo che tu lu âs bevût!

Bete di Spere

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +