Sfuei Mensîl Furlan Indipendent
Archivi de Patrie

Identitât furlane intun mont globalizât (pontade nr. 9)

pre Antoni Beline

La lenghe e je une dai elements fondamentâi de identitât di un popul, ancje se no l’unic. Invezit nus stan clonant inte anime, intal profont. Ancje la glesie e à la sô grande part di responsabilitât. Pazience intai secui passâts, ma lu sta fasint ore presint. E chest al è un pecjât pelôs denant di Diu e de storie.

pre Roman Michelot

Jo o vuei dutis lis lenghis, ancje la mê. No vuei fâ sparî nissune lenghe!

O pensi ae clonazion. Nô o sin un pôc stupiduts e un pôc ancje ipocrits, fals: o vin pôre di vê la stesse muse, no vin pôre di vê la stesse anime. No vin pôre che nus stan clonant, parcè che cuant che no vin muse diferente, cuant che o mangjìn la stesse robe, o sin vistûts mâl compagn, maleducâts compagn, cuant che o vin la anime clonade, mi pâr che o sin avonde mâl. Al sarès cuasi miôr vê la muse compagne e la anime diferente. O sin fals: no vin pôre a fâsi clonâ la anime de television e o vin pôre di vê la stesse muse. Imparìn.

La glesie e à di tasê fin al 3025 e dopo pensâ se e à di fevelâ, parcè che e je la prime clonadorie che e esisti. Une volte a disevin che in Russie se jo o partìs di Arcanghelsk di domenie e o rivi a Vladivostok di martars, o vierç il libri e la messe e va indenant istès cun dôs pagjinis plui in là. Par dî che propit al jere dut chest nivelament. O partìs di Visepente e o voi a Papua al à il stes messâl, i stes oremus, e i stes cjants. Par la cuâl la glesie no fâs nuie pes diversitâts.

E pensâ che i cristians a àn un esempli, un model une vore alt unic e iripetibil: la Trinitât, unîts te diversitât, diviers te unitât.

La robe plui scandalose che propit no rivi a rassegnâmi a capîle e je che la Cjargne e à tignût dûr tai moments di miserie, fruts, debits, pedoi e disgraciis … cumò che ducj a stan ben e mûr. Che al vûl dî propit che e je une sielte di gjenocidi, parcè che cumò che a àn machinis, che a àn dut, la Cjargne e varès di florezâ cun chel ambient turistic che e à. Se e à tignût dûr cuant che a vevin une piore e une cjavre, cumò a varessin di stâ benon. Chest nol è un destin, le àn copade, a vuelin copâle.

Duncje no je une disgracie,

e je une sielte propit di copâ

i piçui. Vuê si invistìs sui grancj numars, su la grande produzion, su la grande industrie… Un invistiment economic, industriâl, ma cence anime, cence culture, cence fantasie. Si ruvine l’om. Ma un om ruvinât al è ancje un pessim operari. Distruzint l’om tu distruzis ancje la fabriche, tu distruzis dut parcè che la prime risorse ecologjiche, ambientâl oltri che sociâl e culturâl al è l’om che al vîf serenementri.

Dal pont di viste culturâl in Cjargne tu cjatis ancjemò tant. La culture e je fate di int, ma ancje di ambient. Rivant in Cjargne al somee di segnâsi, ma là sù tu cjatis ancjemò cjasis, tu cjatis il lûc de anime. Al è tant plui plat il Friûl. In Cjargne a ‘nd è tante robe che in Friûl no ‘nd è. Pal rest, no soi un mâc, o disarès ce che si lei tal libri di Ezechiêl “chei vues tornarano a vivi? Tu lu sâs dome tu Signôr”. ❚

(9, al va indevant)

pre Antoni Beline

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +