NO PAR FURLAN, MA BOGNS. Michael Billig e la banalitât dai nazionalisims dominants

Michael Billig,
Nazionalismo banale,
Rubbettino, Soveria Mannelli, 2018
Par solit cuant che si fevele di nazionalisim si fâs riferiment a alc di traumatic, pericolôs e eversîf. Cheste “etichete” e ven doprade, sei inte opinion publiche sei de bande di tancj studiôs, dome cun riferiment a un ciert cult de identitât estremist, violent e fanatic, che al cjape sù ancje i caratars dal razisim e de intolerance, o ben pes afermazions identitariis e pes rivendicazions di autoguvier fatis indenant des minorancis e des nazions cence stât. In realtât al è ancjemò un altri nazionalisim: al è chel dominant a nivel statâl, che si riprodûs e si rinfuarcìs cence sunsûr e cun costance cuotidiane, che juste par chel nol à la muse triste dal estremisim e cussì tancj di lôr a àn miôr clamâlu “patriotisim”.
Propit cheste forme di nazionalisim, cussì fuarte e struturade, e ven frontade e profondide de bande dal psicolic sociâl britanic Michael Billig tal so libri “Banal Nationalisim”. Dal volum, jessût inte sô version origjinâl ancjemò tal 1995, e esist dome di cualchi mês une version par talian: passe tresinte pagjinis di osservazions e riflessions su cemût che i nazionalisims dominants a condizionin a fuart, in maniere banâl, il pinsîr e i compuartaments di ducj i individuis.  ❚
Marco Stolfo