Malasorti, S’ArdiCity,
S’ard Music, 2018
Malasorti al è un progjet musicâl viert e simpri in moviment. Chestis sôs carateristichis di fonde si palesin in maniere ancjemò plui fuarte e convincente in “S’ArdiCity”, il disc gnûf saltât fûr ae fin dal an passât.
Il cd al da cont dai risultâts de colaborazion jenfri il “misclicesunôrs” Francesco Medda aka Arrogalla e altris doi personaçs une vore atîfs intal panorame musicâl de Sardegne tant che il cjantant Emanuele Pittoni e il trombetist Francesco Bachis, par tant timp te formazion rocksteady di Casteddu/Cagliari Ratapignata. A son dîs tocs che a tocjin lis orelis, il cûr e ancje lis gjambis. Di “Labai” a “Agoa”, al è un biel campionari di ritmis, di sunôrs ipnotics e cjalts e di contaminazions scalembris, tra reggae, dub, rock, pop, eletroniche, ska, folk e ambient. Il dut si messede benon cui tescj in lenghe sarde e cun melodiis che in chel instès a son diretis e no convenzionâls. Un prodot che al rapresente ben une vision di Sardegne cussiente, dinamiche e cence confins. ❚
Marco Stolfo