Un patrimoni di valôr inestimabil
Cïtira e bünkula, il timp batût cul pît sul breâr e cence polse. Doi temis musicâi, doi mûts: na tolso e na tenko, dôs misuris ritmichis 3/4 plui 2/4. Volint, si zonte ancje il cjant, cualchi volte alternât tra oms e feminis. E di sigûr il bal. E je la musiche tradizionâl roseane, che insiemi cu la danze e spiete il ricognossiment di bande de Unesco par deventâ patrimoni de umanitât. Il Carnevâl al è finît di pôc, ancje il Babaz al à vût il so funerâl, tra mascaris bielononis e une grande manifestazion animade soredut di bande dal Grup Folcloristic Val Resie, che al conserve e al trasmet il savê di une culture tant uniche e rare za dal 1838. A son duncje ben cent e otanteun agns di storie.
Chi la nestre atenzion si vûl concentrâ su la musiche roseane, par une forme di art e di tradizion che e à interessât e e interesse une grande varietât di studiôs di diviersis dissiplinis – soredut etnomusicologjie e antropologjie -, coinvolzint ancje tancj passionâts che a discuvierzin simpri di plui un patrimoni che no ‘nd è di compagns.
La musiche roseane e à tantis curiositâts, tacant dai struments musicâi che si doprin. Di fat, la cïtira nol è un violin normâl, ma al ven elaborât biel a pueste cun modifichis tal puintut, che al ven scurtât; la anime – il tocut di len dentri dal violin che al met in comunicazion la taule armoniche cul fonts -, e je spostade sot de tierce cuarde, par “fâle cjantâ miôr”, a disin i sunadôrs roseans. E la cuardadure, e je spostade insù di une tierce minôr a pet de norme. Cuntune tension cussì alte, lis cuardis si rompin dispès e – almancul une volte – si sostituivin ancje cul fîl dal telefon, se no si vevin cuardis di scorte. Ancje l’archet al è tirât plui de norme e la forme di solit e je chê dal archet baroc. La cïtira no si ten sot dal cuel, ma poiade cuintri dal pet e di solit le sunin dome i oms, batint cul pît – di norme chel di çampe – i cuarts. Ae sô man çampe al sta il sunadôr – o la sunadore – de bünkula, che nol è un normâl cuintribàs o violoncel. Al à dome trê cuardis come il liron, acordât daûr de cïtira e cuntune cuarde tacade tal mani par scurtâ la lungjece, e il puintut al ven sostituît cuntun biel massiç di cjastinâr. L’archet nol à vîts, e par tirâ la grene si dopre un cuardin.
La musiche che e ven fûr di cheste formazion – a voltis a son in trê cuntun secont violin che al sune al unison cul prin – e fâs part di un patrimoni siôr che al è stât conservât soredut di bande dai roseans, trasmetût in maniere orâl di nono in pari, in fi, e daspò midiant di un lavôr seri di trascrizions e di regjistrazions sul cjamp cuntune ativitât etnomusicologjiche tacade in chest contest di une grande musiciste e ricercjadore che e à stât dispès in Friûl, ven a stâi la russe Elisabeth von Schultz, miôr cognossude tant che Ella Adaïewsky. Si son interessâts altris studiôs tant che Alan Lomax, Roberto Leydi, Julijan Strajnar, e si interessin vuê altris come Roberto Frisano e Stefano Morandini, e no mancjin publicazions e regjistrazions. Par ce che al tocje i libris, par cui che al vûl svicinâsi a chest mont musicâl, o consei “Cïtira: la musica strumentale in Val Resia” (Pizzicato) di Strajnar e “Un voyage à Résia: il manoscritto di Ella Adaïewsky del 1883 e la nascita dell’etnomusicologia in Europa” (Libreria Musicale Italiana) a cure di Febo Guizzi. Su lis regjistrazions al è di tignî cont il fonts Valter Colle e lis tantis racueltis de tradizion popolâr roseane sburtadis di bande dal Grup Folcloristic Val Resie, par un insiemi di 6 cds. ❚
Alessio Screm
