Sfuei Mensîl Furlan Indipendent
Archivi de Patrie

NO PAR FURLAN, MA BOGNS. La Catalogne contade cun sintiment di Santopadre

............

Marco Santopadre,
La sfida catalana. Cronaca
di una rivoluzione incompiuta,

Pgreco, Milan, 2018

A son pôcs i libris par talian che a frontin cun sintiment e cun atenzion la cuistion catalane. Un di chei al è par sigûr “La sfida catalana. Cronaca di una rivoluzione incompiuta” dal gjornalist, espert di politiche internazionâl e in particolâr di Paîs Basc e Paîs Catalans, Marco Santopadre.

La publicazion, dade fûr ancjemò l’an passât di PGreco, e ufrìs une leture atente des vicendis catalanis, marcant in particolâr la impuartance de cuistion nazionâl e de domande di sovranitât popolâr. Il test al partìs de croniche detaiade des mobilitazions de Sierade dal 2017, al insuaze la situazion specifiche inte storie catalane contemporanie, al ufrìsune panoramiche des formazions politichis e sociâls catalanis e al fronte i grops che no son stâts

ancjemò disfats de transizion dal regjim franchist al ordin politic e sociâl dal dì di vuê.

Tal libri no je dome une selezion di articui scrits intai ultins agns, ma a son ancje lis intervistis fatis cun rapresentants dal indipendentisim catalan e lis traduzions di une schirie di materiâi produsûts dal moviment pe autoderminazion. Dut materiâl bon par cognossi e par capî miôr. ❚

Marco Stolfo

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +