Femine libare, di spirt indipendent, ironiche cuintri chel mont là che si cjatà a vivi e che nus rapresente cuntun voli dut al feminin. Nol è facil ricostruî la sô biografie, che e reste ancjemò sfumade par mancjance di riferiments. Di sigûr, la sô vene poetiche e je declarade tant che un dai esemplis plui biei di scriture inte suaze dal Sîscent furlan.
Gjavant in struc lis informazions dai documents, al ven fûr che Teresa e sarès nassude a S. Denêl ai 22 di Avrîl dal 1675. E jentre tant che terziarie francescane intal convent di Sant Bernardin di Udin cuant che e à dome vincj agns. Il claustri al devente par jê un ambient plen di significât. E je vere che la vite fra chei mûrs e je stade imponude de famee e duncje e devente une preson sfuarçade, come che dispès al sucedeve pes fiis di fameis preseadis e potentis (che a diference dai lôr fradis mascjos no podevin fâ cariere e in chê maniere li no spaçavin la dote). Ma si pues ancje sostignî che il convent al devente un lûc li che a vivin dome feminis: la plui part a vegnin fûr di fameis furlanis nobiliârs, a son istruidis, rafinadis, ben educadis, e a gjoldin di une apartignince ae sfere privilegjade de societât. A àn let e a lein libris, a son educadis a une forme profonde di pinsîr critic. Dispès a coltivin ideâi di grande modernitât, strument di resistence e di riviel cuintri di chel mont mascli che lis à isoladis dal contest civîl, che lis à paradis fûr di cjase e che ur à imponude une regule severe.
E pûr, si pues ancje viodile di chê altre bande: a son i oms che no puedin jentrâ cence il permès de Mari Badesse che e sielç, e filtre, e decît di ameti o no confessôrs, nodârs, zardinîrs e operaris, che dispès a restin inmagâts de cjarie di seduzion fuarte che une muinie biele e zovine e je buine di pandi. Lis cronichis nus contin di trasgressions, di incidents che a àn di jessi investigâts dai vicjaris dal Patriarcje. Dispès, la voie di libertât e devente stimul pe trasgression: cul cuarp e cul cerviel, passant pe iriverence e rivant fin ae eresie.
Teresa e dopre la poesie par esprimi la sô grande voie di indipendence e il so spirt di riviel. La lenghe furlane e devente par jê ancje un codiç impuartant par esprimi dute la fuarce dal so sintî profont, peât ae culture de sô tiere, la lenghe dal afiet e dal cûr, chê de panze e dal sanc. No scrîf dome in furlan, ma ancje par venezian e francês, braurose di jessi plurilengâl.
Lis lirichis a mostrin un sens di marum pal timp che al scjampe cence fermâsi mai, la considerazion sul so cuarp, che jê no considere propit biel e sensuâl, la decjadence che i agns a puartin cun se. Straordenariis lis poesiis là che e cjante il so amôr pe Mari Badesse. A mantegnin une energjie erotiche une vore fuarte, che e pant un ategjament salacor cetant comun, dal moment che l’amôr safic al ven dispès segnalât dai confessôrs tant che une plaie dai convents feminins. Ma Teresa si cjape la libertât di contâlu, ben savint che la acuse di perversion e di pecjât mortâl e jere dome che une mascare par platâ la ecitazion curiose dai confessôrs, plui interessâts a fâsi contâ i particolârs di chei incuintris pluitost che a cirî di capî e perdonâ in maniere cristiane. Cussì, Teresa e prepare une trapule maraveose no dome al frari che al varès di confessâle, ma ancje a ducj chei che leìnt la sô poesie plui famose a son puartâts a pensâ mâl. Dal moment che la liriche – dedicade propit ae Mari Badesse – a prime leture e podarès someâ la confession di une gnot plene di passion, là che cjarecis e sgrifadis a van a tormentâ i cuarps tant che lis animis. E invezit, cuntun ribalton finâl che nissun si spietarès, al ven fûr che l’argoment dal test e je la gjate de Badesse: un butul amorôs di palpâ e che al sgrife, di cjareçâ e che al leche. Duncje une sensualitât birbante, stuzigante e trasgressive, juste par rivâ a zuiâ e a imbroiâ chel mont dut masculin che le à refudade par obleâle a une vite consumade inte solitudin dal munistîr.
Cussì e spieghe la sô poetiche intun passaç une vore significatîf: «Lis mês poesiis a son inspiradis di une voie oneste di divertîsi, un tant par cjapâ flât dai torments di salût che mi perseguitin e ancje par judâmi a sostignî il pês di gnots consumadis inte vee. A bastin a mostrâ che ancje lis feminis, se ben scueladis, a puedin fâ ce che a vuelin, tant che i oms; anzit, di plui. Che une femine e pues fâ maraveis, parcè che noaltris no sin di mancul di lôr, ancje se in tancj no lu crodin».
Teresa Zais e murarà intal 1735, a sessante agns. Libare e indipendente cussì come che e jere vivude. ❚
Agnul Floramo
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +