NO PAR FURLAN, MA BOGNS. Il cine di Orson Welles disparît e tornât a saltâ fûr in Friûl

Massimiliano Studer,
Alle origini di Quarto Potere.
Too Much Johnson:
il film perduto di Orson Welles,
Mimesis, Milan/Udin, 2018
Un libri che al conte une storie “di” cine che par sigûr e zonte alc ae storie “dal” cine e là che si incrosin Americhe e Friûl. Al è “Alle origini di Quarto Potere. Too Much Johnson: il film perduto di Orson Welles” di Massimiliano Studer, publicazion jessude pe Mimesis cualchi mês indaûr, che e da cont de opare prime di Welles, fate tal 1938, che par tant timp si pensave che e fos disparide e che e je tornade a saltâ fûr a Pordenon setante agns plui tart.
Cun chê di contâ de nassite, de disparizion e po de discuvierte di chel film, Studer al presente la zoventût di Welles, tra radio, teatri, cine e politiche, te Americhe dai agns Trente, e al compagne cui che al lei dilunc di un percors che al tache dai Stâts Unîts e al rive in Friûl, là che la pelicule e ven ricognossude e po restaurade par cure di Cinemazero, Cineteca del Friuli e La Camera Ottica.
Dongje de storie dal film e dal so autôr, tal libri – che al à la prefazion di Paolo Mereghetti – si cjatin ancje riflessions di critiche cinematografiche e une interviste cun Ciro Giorgini.❚
Marco Stolfo