Sfuei Mensîl Furlan Indipendent
Archivi de Patrie

I COLÔRS E LIS FORMIS DE STORIE: UN VIAÇ INTE ART DAL FRIÛL. La Madone dal lat te civiltât contadine

............

Ce vuelial dî colâ dentri di un cuadri, esplorâ lis penombris di un afresc, fâ vivi une statue, sintî ce che nus conte une ancone, une miniature, une stampe? Cheste rubriche e puarte ae scuvierte des oparis di art che e je siore la Patrie, ma lis conte dal didentri, cu la vôs dai lôr protagoniscj, intun zûc gnûf e intrigant.
La fonde plui antighe de glesie de Visitazion di Marie a Malborghet e je dal 1200, ancje se di chê ete al reste tant che testemoneance dome che il portâl meridionâl. E jere une glesie une vore impuartante, dal moment che intal 1484 e fo elevade al titul parochiâl par volontât dal Vescul di Bamberg, che al regnave su dute la valade dal Cjanâl, par unificâ sot di jê dutis lis borgadis di lenghe todescje par che a fossin aministradis di chel stes plevan.
L’edifici cemût che si lu cjale in dì di vuê al è componût di doi volums, un dal 1560 e chel altri, plui gnûf, dal Sietcent, dedicât a Sant Zuan. Pesante e fo la ricostruzion dal 1809, che e à imponût a dute la struture un stîl neogotic. Ancje il cjampanili al fo restaurât intal 1915, intant de vuere. L’element plui interessant al reste la lunete frescjade parsore dal portâl, discuvierte dome tal 1985 cuant che, par vie di un restauri, e je vignude fûr une maraveose Madone dal lat dal secul XV, piturade intun stîl tart gotic di une man che e reste anonime e che, daûr dai critics, e pues jessi stade ispirade di Antonio Vivarini, cognossût ancje tant che Antonio da Murano (Muran, 1418 – Vignesie, jenfri il 1476 e il 1484).
La Vergjine e ven presentade intal moment che e da di tete a so fi Jesù Bambin. Marie e devente cussì Mari di Diu e patrone des latoanis. Il cuadri al trasmet une straordenarie intimitât e complicitât cui fedêi, e al rimarche, in plui che chê divine, ancje la nature umane dal Crist, cjapât intun at tant naturâl e plen di pudôr. Il mostrâ il tetin di Marie al regale ancje une prospetive cetant realistiche ae sene, che e spieghe miôr di tantis peraulis la veretât teologjiche de incarnazion: Diu si è fat om come ducj chei altris, e tant che un frut al supe il lat di sô mari, la Madone, che e devente cussì, come intun spieli, ancje la mari di dute la umanitât. Cheste umanizazion fuarte dai doi personaçs plui impuartants dai Vanzelis e sburtave lis feminis a un coinvolziment afetîf cu la fede, che al passave par une funzion che ur vignive ricognossude tant che sacrâl e impuartante, ven a stâi chê di promovi la societât umane cjapantsi cure dai fîs.
La tipologjie de Madone dal lat e gjoldarà di une grande difusion in dute Europe, ma in particolâr intes campagnis, là che la civiltât contadine e tributave a chestis imagjins un valôr no dome simbolic, ma dispès ancje peât ai rituâi di fertilitât. ❚
Agnul Floramo

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +