Giacomo Scotti e i maçalizis fats in Jugoslavie de bande dai talians “brava gente”
A son diviersis parts de storie taliane contemporanie che a stentin a vignî contadis e ricuardadis. Tra chestis a son par sigûr lis azions puartadis indenant de bande dal Ream di Italie e dal regjim fassist cuintri des popolazion locâls intant de ocupazion militâr di Slovenie e Cravuazie, tra il 1941 e il 1943. Su chescj argoments, za di tancj agns, al fâs ricercje, informazion e divulgazion Giacomo Scotti, gjornalist di mistîr e storic di vocazion, frecuentatôr atent e apassionât di archivis e autôr di libris.
“I massacri di luglio. La storia censurata dei crimini fascisti in Jugoslavia”, jessût l’an passât te golaine “Unaltrastoria” de RedStarPress, al è il so volum plui resint, che al fronte in particolâr i maçalizis fats tal mês di Lui dal 1942 su ordin dal Prefet dal Cuarnâr, Temistocle Testa, ju insuaze inte clime politiche e militâr dal timp e al da cont di un grum di testemoneancis e di documents in cont di chei e di altris avigniments. Di lei par cognossi e par no dismenteâ.
Giacomo Scotti, “I massacri di luglio. La storia censurata dei crimini fascisti in Jugoslavia”, RedStarPress, 2017.
Marco Stolfo
