Folk Souvenir, l’elegant «tropicalisim maiorchin» di Joana Gomila
Musiche di autôr scalembre segnade di sugjestions musicâls cence confins e di une vôs inmagante di scuele jazz. Joana Gomila e recupare il cjant tradizionâl des isulis Baleârs e lu torne a inventâ cun tescj origjinâi che a svolin adalt cun melodiis che dispès a cjapin sù formis no convenzionâls e a rivin simpri a tocjâ lis orelis e il cûr di cui che al scolte. Cu la complicitât di cuatri musiciscj di gale – Arnau Obiols, Santi Careta, Alex Reviriego e Laia Vallès – la cjantante maiorchine e met adun une propueste musicâl che e esalte il sunôr de lenghe catalane e che e cree atmosferis svoladiis e suturnis, là che al è puest sei pal scûr de intimitât che pai rais dal soreli cjalt dal Mediterani. L’album ‘Folk Souvenir’, cui siei nûf tocs, al è un biel esempli di chel che si podarès clamâlu «tropicalisim maiorchin». (Marco Stolfo)
Joana Gomila Folk Souvenir, ‘Folk Souvenir’, Bubota Discos 2017.
_________________________________________________________________________
‘La causa dei popoli’, tra informazion e documentazion
Une publicazion a scjavaç tra informazion e documentazion e tra divulgazion e ricercje. Si pues piturâle cun chestis peraulis ‘La causa dei popoli’, la riviste dedicade ai problemis des minorancis, dai popui indigjens e des nazions cence stât, che e veve tacât a vignî fûr tal 2001, cjapant sù la ereditât di ‘Pogrom’, storiche testade de Associazione per i popoli minacciati/Gesellschaft für bedrohte Völker, e che e je tornade a vignî metude adun di sù par jù doi agns. La riviste e je specialistiche e specializade, là che dongje di articui di aprofondiment tematic a son ancje rubrichis, gnovis plui curtis, segnalazions bibliografichis e recensions. Il so numar plui resint al presente un dossier dedicât ai maçalizis dal Biafra di cincuante agns indaûr cuntune schirie di riflessions su chei fats, in chel stes paradigme des catastrofis umanitariis e cuistion politiche ingredeade e dismenteade. Dutis lis jessudis si cjatin ancje in rêt. (Marco Stolfo)
‘La causa dei popoli’, an II, numar 4, Florence, Centro di documentazione sui popoli minacciati, 2017.
