“Suòi nassù dulà che l’aga a la vegn dò de còrsa. Suòi nassù dulà che al temp al’ à al fren a man. Dulà che t’à sèi anch al dì despùa de una ciòca, dulà che i truòis i sparìs”
Une cjançon e une dediche a ducj i piçui paîs che si sintin menaçâts de arogance dai potents. Cussì al scrîf Franco Giordani in note al so gnûf album che al cjape il non propit di chei trois di paîs che dut un colp a sparissin: “Truòisparìs”. Giordani, di Claut, al è un artist che o vin za podût preseâ tai agns pes sôs colaborazions, pes nominis e pai premis che al à ricevût. Finalist di “Suns 2017”, par nô al è simpri un vincidôr, stant che ogni volte nus maravee cul sô spirt, la poesie, la musiche e la vôs. Dopo il Cd “Incuintretimp”, publicât tal 2015, tal Setembar di chest an al è jessût il disc “Truòisparìs”, firmât ancje chest di “Edizione Block Nota”. Il sît https://www.francogiordani.com/ al è fat di pueste par che o butedis un voli. Cheste volte Franco nus puarte in viaç tes sôs tieris nativis: tes valadis dal Cjanâl de Ciline, tiere di mont, di aghis, poetis e scritôrs, che a lôr Franco si ispire par contâ piçui fats, personaçs e storiis veris tant che la tragjedie dal Vaiont. Un percors origjinâl incrosât cuntune lenghe sonore, cun fuartis variantis tra il furlan ocidentâl, il belumat arcaic e la fevele dal Cjadovri. Di Andreis, Barcis, Cimolais, Claut e Ert, simpri doprant tonalitâts e varietâts linguistichis diviersis, cu la vuide dai tescj di Federico Tavan, Giuseppe Malattia e Mauro Corona, l’album fat di cutuardis tocs al è un incuintri di temis varis. Acompagnât di ghitare eletriche e acustiche, bas eletric, bouzouki e de sô vôs, Giordani al conte de mont e dal so abandon, al fevele di amicizie e dal Vaiont, de esistence, de cundizion des feminis, di afiets, di vuere e di disubidience civîl. A realizâ chest contignidôr di emozions che al è “Truòisparìs” a àn partecipât ancje il mandolinist e cuintribassist Massimo e Icaro Gatti, Elvis Fior ae batarie, Jens Kruger cul so banjo, Giulio Venier al violin, il ghitarist Claudio Sanfilippo e tancj altris. L’album al è un tesaur: il cd al è contignût intune cuviertine semplice e artistiche, dulà che l’insiemi al è fat di tescj, traduzions, imagjins e fotografiis di epoche e di vuê, notis dal autôr, citazions e une dediche inedite di Corona al amì Bepi Manarin. Une cjançon che za e à vût tant sucès e je “Ravelli”, balade che Giordani al à cjantât al Stadi Friûl, dedicade al zuiadôr di balon Ruggero Grava, nassût a Claut tal 1922 e mancjât insiemi a dute la sô scuadre dal “Grant Torin” tal disastri aeri di Superga tal 1949. Une conte di sport e di vite, di percors che si incrosin e di storiis che no si dismentein. Truòisparìs al è un album che no si rive a scoltâ cence comovisi, imagjinantsi di sei culì, su chei trois che a sparissin dal Cjanâl de Ciline. Franco Giordani nus fâs compagnie in chest viaç fûr pai trois de vite e infin nus domande “Ce prôvi li persônes normài cuan’ che i sintin ‘na canzòn”? A voaltris la rispueste… Dal sigûr, “Truòisparìs” al restarà indelebil tai ricuarts.
✒ Moira Pezzetta