Sfuei Mensîl Furlan Indipendent
Archivi de Patrie

La imprese dal… Mil

Oscar Puntel

La proteste la fassin cul volantinaç. Sfueis stampâts in propri a caratars cubitâls, pdf che a zirin vie mail e proclams dal lûc internet. Chel dal “Mil” – cemût che a son clamâts a Gjenue – no si fermin denant a nie. Nancje devant al vescul, chel bons. Angelo Bagnasco, che al è ancje president de Conferente episcopâl taliane. E ai prins di Zenâr, cuant che il moviment indipendentist ligure al veve domandât di podê celebrâ une “messe zeneize”, val a dî une messe par gjenovês, (la gnove e jere stade ripuartade ancje tal numar de Patrie di Zenâr – Fevrâr) si son sintûts rispuindi un siôr “no” de Curie. Inalore no àn spietât doi viaçs, prontant un dai lôr documents, dulà che si contestavin trê robis. Si lei: «Pont prin: la decision e je motivade dal fat che il “gjenovês” e ven considerade dialet e no une lenghe, come che invezit e je. Pont secont: si domande al Consei regjonâl di prontâ une leç che e declari il gjenovês lenghe, par che e sedi pupilade e insegnade a scuele, no dome par no pierdi la atualitât, ma ancje par che e deventi fondament di chê vere integrazion tra cui che al è nassût a chi e i forescj. Pont trê: si invide il vescul di Gjenue a studiâsi par ben la vere storie di Gjenue e de Ligurie».
E je propit la storie, la vere ossession dal Mil. Il moviment no si definìs secessionist, par vie che nol ricognòs, par principi, la anession al Ream di Savoie prime e al Ream di Italie po. E su la fonde di chest supuest, la Ligurie e varès mantignût inalterât tal timp, une sorte dirit internazionâl ae indipendence. Se e cole la legjitimitât, e cole il palc: no nd’è bisugne di domandâ separazions. Stant a ce che a disin chei dal “Moviment”, la anession ae cjase Savoie, sancide dal Congrès di Viene dal 1814 e operative ai 7 di Zenâr dal 1815, e sarès une violazion ae stesse motivazion pe cuâl al fo convocât il Congrès (stabilî la sovranitâts esistint prime dal 1797) e al ve la ferme contrarietât dal legjitim e sovran guvier de Republiche di Gjenue. Cun di plui sul teritori no si sarès votât nissun plebissît di anession.
Chei dal “Mil” si fâssin puarte-vôs di une istance indipendentiste che e passe la Ligurie. Chel teritori che al fo par siet secui sot de Republiche di Gjenue e che al cjape dentri ancje lis tieris assegnadis ae provincie di Alessandrie e al Piemont, in gracie de leç Rattazzi dal 1859. La Ligurie indipendent che e àn iniment e sarès une Republiche federâl, che e garantissi la massime autonomie a dutis lis comunitâts liguris sul model de Confederazion svuizare. Par intant, a son rivâts adore di puartâ a cjase, tal ordin: la titulazion di une place di Gjenue ae viele Republiche e il bon acet dal consei comunâl ae poie di une targhe sul monument a Vitori Emanuele II che e spieghi il rûl davuelt dal sovran tant dal “Sacco di Genova”.

_________________________________________

Interviste al vulcanic president che al à in asse i Savoia
Al berle e al scjalpite al telefon, Vincenzo Matteucci, president dal Mil, il Moviment indipendentist ligure. Setante agns, di profession dentist, al criche il dì sul puarti di Gjenue e lui al scomence la zornade cu la rassegne stampe. Po al pronte i bancuts par tirâ su lis firmis.
Matteucci, ancje pe “Messe zeneize” o vevis mobilitât il popul?
«Chê aromai e je passade. O tirìn su firmis di continui. Ma in chel câs, il vescul nol pues nie. Il Stât al ricognòs ciertis lenghis, come tal vuestri câs, ma chês altris? A son fiis di nissun».
Parcè la vuestre ise une lenghe?
«La àn simpri fevelade. E je simpri stade la lenghe de Ligurie»
Ma esistie une gramatiche?
«O vin libris, leterature. Che lu domandi al professôr Franco Bampi. Che lu clami: 320.43… al è lui che al è daûr a studiâ la nestre lenghe. E par che a sedi ricognossude tâl».
Passìn ai programs. L’aspiet plui colorît al è che vês in asse i Savoia.
«Purcits! Nus àn fatis di ducj i colôrs. Ju odeìn. Ma si rindêso cont che cuant che la nestre citât a fo sachizade tal 1849, Vittorio Emanuele II al scrivè a La Marmora che al veve fat ben cuintri chê “maledetta e infame razza di canaglia”.
E po o varessin di acetâ che la place plui biele di Gjenue e vedi une statue dal re?».
O domandais la indipendence de Italie par vie che no ricognossês la anession.
«Dal sigûr. Nô no domandìn la secesion. Il divorzi si domande cuant che si è sposâts, nô no sin mai stâts sposâts cu la Italie».
E dopo dut chest timp, speraiso di stacâsi?
«Dopo trop timp Macao ise deventade indipendent dal Portugal?
No lu sai.
«400 agns. Ma insome: il Kossovo sì, la Cravuazie sì, la Slovenie sì. Parcè nô, no?»
E cemût speraiso di fâ?
«Fassint leve sul desideri dal popul, su la cussience de int. E cun chestis o sburtìn viers lis istituzion.
O volìn jentrâ in Consei regjonâl, tal 2010 e fâ ancjemò di plui casin. Ogni dì o vin doi mil contats sul sît internet. A ogni bancut o din vie cinc mil volantins».
E in sede Onu, vêso provât a pocâ?
«La Onu e dîs che il probleme al è dal Stât che o sin peâts».
La strade viers indipendence ise cuvierte di federalisim?
«Se nus al dan no si lamentìn. Ma no tal sens leghist dal tiermin. La Ligurie e à un jentrade fiscâl che e je fate di tassis portuâls di trê puarts. Chescj a rindin 5 miliarts di euros (plui dal belanç di dute la regjon), che a finissin ducj a Rome. O domandìn che almancul l’80% di chei bêçs a restin chi.
E ancje la gjestion de energjie de Ligurie:
o volìn fâ come i valdostans. O domandìn une societât che e sedi di competence de nestre Regjon».
Bhe, chest lu podês domandâ diretementri al “vuestri” ministri Scajola.
«Impussibil: al è talianot».

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +