Sfuei Mensîl Furlan Indipendent
Archivi de Patrie

Posizion clare su la cuistion nucleâr

Janez Erat

AL SORELI BONÂT CUN FUARCE IDRICHE, AL SORELI JEVÂT SIMPRI DI PLUI AEROGJENERADÔRS_ La Gjermanie, i Paîs Bas e la Belgjiche a àn proclamât la fin de dade nucleâr, agns indaûr lu àn mostrât la Italie tant che la Austrie, Irlande, Danimarcje, Svezie e altris in Europe. Par pôre dai presits di combustibii tradizionâi impaiabii in Italie si torne di gnûf a fevelâ de opzion nucleâr.
La rispueste uficiâl austriache al ultin incident te centrâl nucleâr in Slovenie nus à visât la sô posizion clare cuintrinucleâr, dividude di ducj i partîts politics. In Carintie a àn aprovât za tal an passât une risoluzion che e domande la sieradure dal implant di Krško, costruît 26 agns indaûr, pe sô locazion gjeografic si riten il pericul sismic une vore alt, vierte – secont i austriacs – ancje la cuistion dai refûts nucleârs.
FIN AL 1955 A JERIN IMPROIBIDIS LIS ATIVITÂTS TAL CJAMP NUCLEÂR_ Dopo la seconde vuere mondiâl fin al Tratât di stât dal 1955 dutis lis ativitâts nucleârs a jerin improibidis. Fin al 1960 a meterin dongje cul jutori dai Stâts Unîts il prin centri di ricercje nucleâr a Seibersdorf dongje di Viene.
Tal 1972-77 a faserin sù la prime centrâl nucleâr a Zwentendorf in Basse Austrie cu la potence di 730 MW. Il plan energjetic al proviodè inmò la costruzion di adun 3 centrâls. Ancje se la politiche si pandè unide su cheste cuistion, il moviment antiatomâr al gjoldè un grant supuart de popolazion, dopo une schirie di protestis il plebissît dal 5. 11. 1978 al fermà par simpri l’insium nucleâr. Dal 5. 12. 1978 la leç “Atomsperrgesetz” e proibì il disfrutament de energjie nucleâr in Austrie. Cul montafin di Chernobyl tal 1986 si cuietarin ancje i ultins tentatîfs di ativâ la centrâl di Zwentendorf.
PROTESTIS CUINTRI LIS CENTRÂLS DI LÀ DES FRONTIERIS NAZIONÂLS_ Daspò di cheste date la politiche dutune cu la popolazion e reste fis di idee antinucleâr e a batin pîts e mans cuintri lis centrâls di là des frontieris nazionâls. Un dai plui grancj sucès al fo la inibizion dal implant di rigjenerazion dal combustibil nucleâr Wackersdorf in Bavarie tal 1989. Tai ultins agns lis lagnancis si concentrin cuintri la centrâl ceche di Temelín.
LA PART DES ENERGJIIS RINOVABILIS E JE TRADIZIONALMENTRI ALTE_ Il bocon des energjiis rinovabilis al è tradizionalmentri alt in Austrie in confront al rest de Europe, daspò dal principi dai agns 1980 al jere parsore di 20%, tal 1999 e 2000 inmò sore di 23%.
Grazie ae sô topografie alpine e aes notabilis cuantitâts mediis di precipitazions, si cjatin in Austrie, soredut in Tirol, tant che in Suizare, condizions ideâls pal disfrutament de fuarce idriche.
Cussì nuie di strani tant che in Suizare ancje in Austrie la fuarce idriche e je ce che al rivuart la cuantitât la font energjetiche plui impuartante. Dal 1980 al 2004 58,6 – 74,5 % de produzion indigjene di energjie eletriche e diven de fuarce idriche.
Tai agns Novante e tacà la discussion politiche sore lis possibilitâts di cemût sfrutâ la energjie dal aiar. Dome tal an 2003, dopo decisions politichis a favôr de costruzion di gnûfs implants, si regjistrà un vêr boom de fuarce dal aiar. Il potenziâl dai implants al vignì triplicât, dopo chest la Austrie e vignì ricognossude ancje sul plan internazionâl tant che inovadôr di energjie dal aiar.
Daûr lis ultimis ricercjis fatis in ocasion de zornade europeane dal aiar la maiorance dai austriacs e stice un aument de corint ecologjiche „Ökostrom“. La plui benvolude e je la corint dal soreli cun 97%, subit daûr chê dal aiar cun 89%.
Negatîf: 96% al dîs no ae energjie nucleâr.

______________________________________

Il campionât di balon a Clanfurt dome par todesc
Il Consei dai Slovens di Carintie/ Narodni svet koroških Slovencev (NSKS) al à criticât intune declarazion la presentazion unilaterâl de Carintie tal campionât di balon.
“Ancje nô o volìn che il campionât al sedi une fieste di sport e amicizie. La Carintie uficiâl e tâs denant il public internazionâl il fat che in cheste tiere a vivin ancje slovens.”
Ancje la Koroška Dijaška Zveza (KDZ) la Union dai zovins slovens e vûl meti in avertence i visitadôrs dal campionât european e lis mediis che la Carintie e je un paîs bilengâl. Jože Wakounig, dal 2003 president dal Consei dai slovens, disdegnât si lagne che ae scree di chest event internazionâl la culture slovene e je restade fûr, no fo pronunciade ni une peraule slovene, cussì si è adempît za il slogan dal governadôr Haider „Kärnten wird einsprachig” (“Carintie e torne monolengâl”). “Mi domandi cuant che o fasarìn cuintri chest gjenocidi culturâl..Tant che realist o ai spietât il câs plui grâf e cussì al è ancje tocjât.”
Wakounig al critiche ancje Lubiane che no fâs altri che dome tasê. “Ancje nô o podìn fâ alc, purtrop la minorance slovene no je unide, se cuachidun al vûl fâ alc a pro de minorance, di subit lu dan di nazionalist. Il nestri fin comun al à di jessi dome la sorevivence, se no varìn la voie di fâ alc, dut al pierdarà il so sens.”

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +