Sfuei Mensîl Furlan Indipendent
Archivi de Patrie

MUSIS DI…FACEBOOK. Average Furlan Guy: il “tipic furlan” che al è un grant sucès

Dree Venier

La pagjine Facebook de Patrie al è un imprest par difondi il gjornâl, ma ancje par incuintrâ i letôrs e par dialogâ cun lôr e cu la int che e baline pal social network. E cussì al capite di cjatâ cualchi realtât interessante…
✽✽✽
A son i ultins rivâts, ma a àn za fat il disastri. Plui di 18.000 like (i “mi piace”) in pôcs mês di vite, une percentuâl di difusion dai contignûts miôr dal Facebook dal Messaggero Veneto che al à il tripli di adesions: ve ca chei di “Average Furlan Guy”. Il non, par inglês, al starès plui o mancul par “il tipic furlan” o “il furlan medi”: i tipics “tic” dai furlans a vegnin esaltâts o metûts a confront cun chei dai forescj. Il biel al è che dispès a son robis che si podaressin considerâ difiets, cuntune operazion di “ribaltament” che e puarte a vê braùre ancje di chei, e ancje la maniere di descriviju no je masse “politically correct”. Ma cui sono chescj “fûr cul cjâf”?
–––
Mandi, “guys”! Cui aministrial la pagjine, di dulà sêso e cemût mai il titul par inglês?
Mandi!! O saressin in sîs, ma o scrivìn in cinc: Nicola (Nick), Marco (Marco), Simone (Glere) di Tisane e dintors, Enrico (iQ) di Udin, Fabio (Il Balla) di Sant Vît al Tiliment. Etât jenfri i 21 e i 29 agns. Cualchidun di nô al è aministradôr di pagjinis Facebook di rilevance nazionâl. Il titul par inglês al sunave ben, disìn: al è vignût fûr par puartâ une vintade di gnûf tal Friûl. Nus someave adat par proietâ il Friûl te ete digjitâl.
–––
Cemût e cuant ise nassude la pagjine (ancje tart rispiet a tantis altris furlanis)? E si saressiso spietâts un sucès dal gjenar?
La idee i è vignude a Nick, notant altris pagjinis talianis, e ancjemò di plui forestis, che a vevin par teme l’argoment “average guy” (fantat/persone tipiche): “Parcè no vino di fânt une sul Friûl e o tachìn a coionâsi di bessôi?”. Cjacarant cun Marco, al è stât entusiast de idee e o vin metût sù insiemi la pagjine, ai 25 di Fevrâr dal 2014. Par un pôc al à scrit cun nô ancje un nestri amì (Stefano), ma si è in pratiche ritirât. Dopo a son rivâts Glere, iQ e Il Balla, che a an dade une gruesse man a slargjâ lis ideis e lis publicazions.
Nô o sin rivâts par ultins, ma o volevin deventâ la miôr pagjine furlane su Facebook, puartant inovazions e fasint imagjins ORIGJINÂLS (fatis cul nestri cjâf) e no copiadis ator par Facebook. O pensavin di rivâ al plui a dîs mil “like” e invezit e je stade une sorprese lâ indevant a cressi oltri. Nus fâs plasê savê che lis nestris descrizions dal furlan tipic a sedin cussì sintudis, seguidis e condividudis: al vûl dî che lis tradizions no son dismenteadis, e nô o larìn indevant a cirî di puartâlis in lûs.
–––
Voaltris o descrivês e cuasi o esaltais ancje difiets tipics: jessi cjochetons, une cierte ruspidece, l'”average furlan vecjo” (il “tipic vecjo furlan”) preocupât dome dai siei cudumars… No vêso vudis critichis di cualchi “tipic benpensant”?
Sì, o vin simpri pensât di descrivi il vêr furlan cence restrizions, censuris e moralisims inutii: il furlan te intimitât al è cussì, parcè varessino di descrivilu in altris manieris? Lu fasìn ancje par esaltâ il furlan e il nestri mût di vivi, cence invezit par fuarce dovêi vaî parsore. Clâr che lis critichis a son rivadis, ma mancul di chês che o pensavin. Tal 90% dai câs, i moraliscj a vegnin a fasi sintî, tramite coments, cuant che o publichìn l’intercalâ plui famôs de lenghe furlane: la blesteme. O cualchidun tal imprin nus diseve “la vêso finide di coionâ i furlans?”.
Purtrop chê int che nus critiche no à un mût di pensâ adat ai social e no si rint cont di cuale che je la realtât e lis nestris intenzions. Se cualchidun nol vûl sintî lis veretâts sul Friûl butadis in ridi, al è libar di no seguî le nestre pagjine.
–––
Il dut, di fat, al è “cuinçât” ancje cun cualchi… ehm… blestemute chi e là: cemût rivaiso a sghindâ la censure di Facebook? E ce pensaiso di chest intercalâ dai furlans no masse “politically correct”?
Cualchidun di nô si à za fat i vues aministrant pagjinis di umorisim fuart e “dibatût”, duncje o savìn fin a ce pont fracâ la man tai contignûts. Po dopo… cjate tu un furlan che nol blestemi! Dificil? Dificil ancje duncje che un furlan ti segnali une blesteme, jessint cuasi ducj furlans te pagjine. Pal furlan tipic al è dificil propit esprimisi cence blestemâ. A voltis tu âs di capî ciertis frasis decifrant i acents tes blestemis. Chest nestri intercalâ al è di viodi tant che dôs semplicis peraulis, cence pensâ al reâl significât. O savìn che par cualchidun al podarès jessi no masse plasevul, ma e je propit une robe tipiche e no podìn fâ di mancul di ripuartâ dut chest te pagjine. O crodìn che il furlan nol blestemi par ofindi cualchidun, ma dome par dâi plui sens ae frase.
Facebook par fortune nol sta tant daûr a lis blestemis (soredut par furlan), ma plui che altri ae violence, al razisim e ae nuditât.
–––
Ce robis àno plui sucès di condivisions e di “mi plâs”?
Pal sigûr il nestri “average vecjo” e dut ce che i va daûr. La globalizazion dai ultins agns e à vualivât la culture dai zovins, duncje i personaçs che a incjarnin di plui il spirt furlan a son propit i anzians. La int in chestis imagjinis e riviôt i nonos, i vecjos dal paîs, i contadins de campagne e i cjochetons di ostarie che a zuin di briscule tra blestemis e tais di vin. A van ancje lis imagjins su lis cjochis e lis situazions intrigosis cu lis blestemis.
–––
O doprais avonde il furlan, e mi pâr che la int e rispuindi ben, doprantlu in maniere trancuile. Ce pensaiso dal ûs dal furlan su internet?
Ancje nô o fasin fature a cjacarâlu e a scrivilu, par vie dal talian fevelât sul lavôr e a scuele.
Par cont nestri, al varès di deventâ di oblic par ducj nô furlans. Facebook al podarès benon creâ une version dal social network par furlan. Al sarès di invistî di plui sul furlan tes scuelis par scrivilu e fevelâlu “uniformât”, di mût di parâ vie lis eternis diatribis tra il furlan de Alte, chel mezan e chel de Basse. O sin contents di vê metût dongje la int a fevelâlu intun unic puest virtuâl (la pagjine Facebook).
–––
Daûr dal sucès de pagjine o vês fat ancje cualchi radun, cemût isal lât? I letôrs us mandin ancje fotos e materiâi: ise une partecipazion fuarte?
Il nestri prin radun al è stât fenomenâl: no si spietavin propit dute chê partecipazion di bande dai nestris fan!
Al è stât propit biel confrontâsi (bevint guantieris di biris) cun lôr! Cualchidun si è fat ancje 50 chilometris par vignî a cjatânus. O vin propit une fuarte partecipazion di bande di ducj: nus mandin sugjeriments par gnovis imagjins, fotos di lôr cu la bandiere dal Friûl ator pal mont, fotos di lôr cjocs madûrs, e v.i. Disìn che chest al jere il spirt che cun chel o vin creade la pagjine: movi un sens fuart di partecipazion. O sin propit contents!
In zonte ae pagjine o vin ancje un grup cun plui di 1200 iscrits in continui aument par tignî contat cun chei plui acanîts. Dentri nus mandin ideis e a publichin lôr ce che a vuelin par ridi.
–––
Cualis sono lis miôr pagjinis furlanis su Facebook, o chês che o leiês di solit (a part AFG, clâr…)?
Argoment duliôs par noaltris… Tal sens che nus plasin lis pagjinis che a fasin contignûts divertents a sfont furlan, ma soredut origjinâi, come che ti vin spiegât prime. Nol è facil cjatâlis. Cuant che o vin screade la nestre pagjine, e o vin scomençât a publicâ, o vin cjatât i nestris identics post in altri pagjinis cence vignî mai citâts (par fâti un esempli). E cumò cuasi dutis lis pagjinis a son cussì. Duncje si limitìn a seguî pagjinis di informazion locâl.
–––
Secont voaltris Facebook e i social puedino judâ lis piçulis lenghis?
Dal sigûr sì, soredut lis pagjinis come la nestre!
Di cuant che e je stade creade, in tancj amîs nus fermin e nus disin: “Oh, di cuant che e je AFG o feveli ancjemò di plui par furlan e mi sint propit leât a cheste tiere”! Facebook al è un mont tant seguît cumò e duncje invistî li cul furlan e podarès jessi pardabon une buine strade. ❚
✒ Dree Venier

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +