Sfuei Mensîl Furlan Indipendent
Archivi de Patrie

Autenticitât al Fogolâr di Rome: interviste a Francesco Pittoni

............

Francesco Pittoni, di famee cjargnele, inzegnîr, soci dal Fogolâr di plui di 45 agns, conseîr e vicepresident, dai 9 di Jugn al è il gnûf dean dal Fogolâr di Rome. Sflandorose cariere professionâl, tancj interès, ma soredut inamorât de mont e de Cjargne.
Cuale ise la realtât dai Fogolârs tal 2014?
Come za sotlineât tal intervent di Pordenon dilunc dal incuintri anuâl dai Fogolârs, fevelant di Fogolârs si à di tignî presint lidrîs e identitât, no dome come concets assolûts ma come autenticitât dal jessi furlans. Mi riferìs a un sproc let intun ripâr alpin: ‘Ancje i arbui come i popui a àn la lôr identitât parcè che autentics’. Il furlan emigrant, cu la valîs di carton al è lât ator pal mont e al à fondât i fogolârs. Chestis realtâts cumò a rapresentin ponts di une rêt sparniçade pal mont, plui di 150 vetrinis par difondi la autenticitât de culture, a partî dai Celts, ma ancje dal patrimoni produtîf e des ecelencis enogastronomichis de nestre Regjon.
E la realtât dal Fogolâr di Rome?
“Il Fogolâr Furlan di Rome al à une buine cuote di simpatizants, ma un numar di militants che nol baste. Deventâ president di chest Fogolâr al vûl dî cjapâ sù une ereditât impuartante, e covente une grande partecipazion e sostegn dai socis. La nestre e je une vetrine privilegjade dal Friûl”.
Cuâl saraial il fîl condutôr dal gnûf cors?
“Autenticitât e Web. Si varà di partî dai aspiets dai furlans viodûts fin cumò come negatîfs par cjatâ gnûfs stimui. In 50 agns la popolazion in Friûl si je smiezade e si à vût un mancul 10% di ativitâts produtivis; bisugne cirî soluzions. La precarietât dai agns de emigrazion e à di jessi la ricjece di vuê, vint realizât une organizazion, i Fogolârs, che a àn di jessi cumò un pont di fuarce dal Friûl, come che o disevi prime. I Celts no scrivevin, dute tradizion orâl; invezit si varès di scrivi, di trasmeti il savê autentic par puartâ une vision reâl de furlanetât. Ancje la tindince ae individualitât (‘Fasìn di bessôi’) e je coventade par lâ indenant tai moments plui dûrs a cjâf bas, ma al à di jessi cumò un limit superât, scuintrantsi magari cu la difidence e lis rivalitâts. Intun mont dulà che il Web al met in contat il Friûl cun ducj i furlans ator par lis diferentis nazions in timp reâl no si pues restâ isolâts! Se si considere par esempli lis ativitâts dai albiercs difondûts (viôt articul Patrie dal Friûl 2012), si varès di fâ in mût che ducj i Fogolârs a cognossessin e mostrassin cheste valide realtât, element di rinassite des nestris monts (www.arbergodiffusotolmezzo.it), ma si sbat cuintri tante burocrazie e tante difidence. Al è un lavôr che al clame dongje tantis fuarcis (Regjon, Ente Friuli nel Mondo, Fogolârs,Turismo FVG), che a àn di vê voie però di lavorâ insiemit”.
Al Fogolâr di Rome sarano alore presentadis robis furlanis?
“Dome robis furlanis! Gracie al vicepresident, dot. Gianluigi Pezza, une fuarce inestimabile no dome dai nestris programs culturâi, si è realizade ai 25 di Jugn, par sierâ l’an sociâl, une serade in memorie di Arturo Zardini, poete compositôr di “Stelutis alpinis” e il coro Malga de Associazion Nazionâl Alpins di Rome al à interpretât cjants furlans di chest autôr. Cumò e je za in program une “cjaminade virtuâl pal Friûl”, in ocasion de comemorazion de Prime Vuere Mondiâl dal 15-18; il rest sul sît dal Fogolâr di Rome, che al sarà il nestri biliet di visite”.
Bon lavôr, President! ❚
✒ Mara Piccoli

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +