Sfuei Mensîl Furlan Indipendent
Archivi de Patrie

SLOVENIE. La Slovenie no à rivât a sielzi il so comissari UE

............

Al sarà il president de Comission europeane, Jean-Claude Juncker, a sielzi il prossim comissari sloven. La politiche slovene di fat no je rivade a cjatâ un acuardi sul non di proponi tant che candidât unic ae Comission europeane. Il guvier sloven dimissionari di Alenka Bratušek al à spietât fin ae scjadince dai 31 di Lui par provâ a fâ converzi ducj dome suntun non, ma ae fin al à inviât une liste cun trê nons: chel dal (aromai ex) prin ministri Bratušek, dal ministri dai Forescj e leader dal partît dai pensionâts DeSUS Karl Erjavec e di Tanja Fajon, europarlamentâr dai socialdemocratics. Il vincidôr des ultimis elezions Miro Cerar al varès vût miôr la riconferme dal comissari di cumò pal Ambient Janez Potocˇnik, ma chest ultin si è ritirât de contese cence ritignî oportun l’inseriment dal so non intun zîr di plui candidâts.
Tanja Fajon, 43 agns, vicepresidente dal Grup de Aleance Progressiste di Socialiscj e Democratics al Parlament European, e je stade proponude dal leader di cumò dal so partît SD Dejan Židan: “E à tancj agns di esperience di lavôr a Brussel – al à sclarît Židan (prime de sô prime elezion intal 2009 e je stade corispondente des TV di stât slovene, RTV Slovenija, propit di Brussel, ndr) -, e fevele diviersis lenghis forestis, e à tante esperience intal cjamp dai dirits umans (e je membri de Comission pes libertâts civîls, la justizie e i afârs internis, ndr), de lote cuintri la coruzion e la criminalitât”. Zidan al à fat ancje savê che al sarès stât disponût a ritirâ la candidature de eurodeputade se il guvier al ves cjatât un nominatîf che al podès contâ suntun larc consens; circostance che, però, no si è verificade. Il leader dal partît dai pensionâts Karl Erjavec, che nol à mai scuindût lis propriis ambizions a deventâ comissari, al è stât segnât tant che comissari potenziâl pal slargjament de Ue. Alenka Bratušek invezit, inte vieste di prin ministri sloven (che di fat si è autocandidade a comissari european), e à comunicât a Brussel che la Slovenie e sarès interessade ai setôrs dal traspuart, dal belanç o de politiche regjonâl.
La decision dal guvier di rinunziâ a sielzi in maniere autonome il propri comissari, di fat delegant la sielte finâl a Juncker, e je stade ogjet di critichis ancje de bande dai stes europarlamentârs slovens. Nol à plasût nancje che e sedi stade trascurade la opinion dal partît di Cerar che al à vinçût lis elezions politichis di Lui. Chei plui critics a son stâts in ogni câs i deputâts dal PPE, Partît popolâr european, che a fasin part i partîts slovens SDS (Democratics), NSi (Nova Slovenija – Cristians democratics) e SLS (Partît popolâr sloven). Chescj a àn inviade une letare al president de Comission europeane Juncker par fâ savê “il propri pinsîr” pe nomine dai candidâts slovens a comissari european. I europaralmentârs di SDS, NSi e SLS (partît, chest ca, che aes politichis nol à passât il soiâr di sbarament) a àn evidenziât cemût che intal parlament european a cjapin insiemi il 62,5% dai seçs che a tocjin ae Slovenie (5/8). Ma, par motîfs naturâi di oportunitât, no àn specificât che la afluence aes europeanis e je stade a pene che dal 24,6% – e che la sume des percentuâls otignudis dai trê partîts in chê tornade e je stade dal 41,4%. A àn rimarcât cun di plui cemût che la liste dai candidâts inviâts a Brussel e sedi espression dai partîts che a àn di fat pierdût lis ultimis elezions. In conclusion, a àn definît i candidâts di cumò ”eurosetics” e esprimude la proprie disponibilitât a aprofondî ancjemò di plui la cuistion cul president Juncker.
Chel che al è sigûr, al è che Juncker al à plui voltis ribatude la volontât di costruî une scuadre componude di almancul nûf feminis (tantis a jerin inte legjislature precedente). Su lis candidaturis slovenis, fonts dongje dal president a àn fat savê che Juncker al è intenzionât “a cjapâ in considerazion dutis lis opzions intal ambit de distribuzion des deleghis, tignint cont ancje di altris fatôrs impuartants tant che il pês politic e la esperience dai candidâts”. Par chescj motîfs, la favoride e podarès jessi propit Alenka Bratušek, che, stant a fonts uficiosis, il president Juncker “al presee e al stime tant”. ❚
Tjaša Gruden

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +