Sfuei Mensîl Furlan Indipendent
Archivi de Patrie

MUSICHE. Vegnin jù, vegnin jù… vincint il Premi Friûl

............

Il Premi Friûl al è lât inmò in Cjargne: i cuatri musiciscj da “La Bande Eletriche”, in cheste formazion di Zenâr, a vegnin di For Disot, Çurçuvint, Tierç e Tumieç. E come l’an passât cun “Ulisse e i Ciclopi”, ancjemò une volte a imponisi al è stât un grup une vore zovin: Massimo Silverio ‘Silver’ vôs, Nicolò ‘Nico’ Di Ronco al bas, Andrea Marchi ae batarie e Fabrizio Polonia ‘il Ros’ ae ghitare, a àn di pôc passât i vincj agns. Sintìn cemût che e sune la Cjargne “eletriche” cun cheste interviste al Ros.
A disin che o sês une blues band
Par dî il vêr, no vin mai dit di jessi un grup blues. E je une etichete che nus àn tacade: nô no volìn sunâ nissun gjenar pûr, no acetìn la idee di sierâsi, o cirìn simpri di spaziâ. Il blues nus plâs, come chel dai Bud Spencer Blues Explosion o dai White Stripes. Ma nus plâs ancje Frank Zappa e i Led Zeppelin, la musiche progressive e il rock agns Setante.
A viodius, o someais plui metalârs: cun chel non, i cjavei luncs e chel “nudist” sul palc (un che al sune simpri cence maiute, ndr)…
Si clamìn cussì parcè che prime o jerin un doi acustic, daspò il passaç ae musiche eletriche cul gnûf grup e di chê volte il non. Il nestri bassist al è l’esibizionist dal grup (al rît) e al è un amant dai sports estrems: un pôc Mauro Corona e un pôc Red Hot Chili Peppers!
Cemût sêso rivâts al Premi Friûl?
O cognossìn la manifestazion di cuant che i Carnicats, che a son de Val dal Tiliment come nô, a àn vinçût. O vin simpri vût un grant rispiet par cheste manifestazion che e à vût il mert di sburtâ une vore di musiciscj. Po, une dì, un amì dal zîr dai grups cjargnei nus à conseât di partecipâ. No crodevin di vignî selezionâts, e tant mancul di vinci: il nivel dai grups al Cormôr al jere alt.
A proposit dal zîr dai musiciscj cjargnei, cemût ise la sene musicâl di chês bandis in dì di vuê?
Al è un moment bielissim in Cjargne, se tu sês un musicist. A son une vore di concierts, i grups si cjatin tai bars, si passe tant timp insieme tra musiciscj, si cognossìn ducj. A saran une ventine di grups zovins e si sint fuart il plasê di sunâ. Al è un moment une vore produtîf, cun grande colaborazion.
Ce che al è de Cjargne inte vuestre musiche?
Ducj i tescj si fondin su robis viodudis achì. O vin cjapât la musiche di fûr ma i contignûts ju vin puartâts di ca. Par esempli, “Lavôr” – il toc vincidôr dal Premi – al fevele di un pari, di un fi e di un nono: une famee di trê gjenerazions dulà che il plui vecjo si è rote la schene intune vite di emigrant, il pari al è operari e il zovin cence lavôr. Come che o cjantìn in Cjargne, chi ognidun al puarte la sô crôs.
E “Sbarbinescion” di ce contial?
Cheste e je funky e e je une di chês che a plasin di plui. E conte di robis di “sbarbine”: “…in stazion dute trucade, cu la mini ben scurtade, il telefon che al sbrove, mil messagjos brute scrove, che a ti scrivin pervertîts, da 20 agns son maridâts, sbarbination…“. A son fatarei di nestris cognossincis, riviodûts in maniere ironiche.
Parcè cjantâ par furlan?
Noaltris o cjantìn dome par furlan o par inglês cun covers pôc cognossudis di rock agns ’50 o di Frank Zappa. In marilenghe la musiche e rive plui drete, nus divertìs di plui e in gjenerâl al è un rapuart plui intim cjantant par furlan. Anzit, par cjargnel.
Ce fasaraie la Bande Eletriche di culì indenant?
O stin cirint di rivâ al nestri massim, come capacitât strumentâl e musicâl in cuatri. O sin daûr a sburtâle e, in reson di chel, a scrivi tescj dulà che si sint cheste tension. A pene finide la stagjon estive dai concierts, si sierarìn in sale prove e o sbrocarìn la imagjinazion! ■
Natascia Gargano

Lenghe minoritarie / FluxJudri25 – Giassico

Redazion
Conferece “Lingue minoritarie: le capitali della cultura e il rilancio del territorio” . A son intirvignûts Elena Gasparin, Dree Valcic president de Clape di Culture Patrie dal Friûl, Eros Cisillino president ARLeF, William Cisillino diretôr ARLeF, l’On. Guido Germano Pettarin e il coletif Lis Tarlupulis. FluxJudri25.Ca sot l’intervint di Valcic. lei di plui +

L’EDITORIÂL / Un Friûl disarmât

Walter Tomada
Lant ator pe Italie dispès al capite, cuant che si dîs di jessi furlans, di cjatâ int che nus dîs “Ah, mi visi dal Friûl! O ai fat il militâr a Udin!”. Prin dal taramot, un abitant su dîs chenti al jere un soldât e cheste ereditât di “tiere di primulis e casermis” se puartìn […] lei di plui +

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

5 Par mil / DANUS UNE MAN

Redazion
5 PAR MIL – Ancje chest an, cu la declarazion dai redits tu puedis dâi une man a La Patrie dal Friûl, il mensîl dut in lenghe furlane dal 1946. Nol coste nuie, baste meti il numar 01299830305 te casele juste: Sostegn dal volontariât e des altris organizazions no lucratîvis di utilitât sociâl, des associazions […] lei di plui +