MUSICHE. Sunâ swing restant furlans

Su YouTube al capite di inclapâsi intune band une vore insolite: insieme cul jazz, il country, il swing e il blues, il grup al sune melodiis “strambis” che a vegnin di lontan. O sin a Melbourne, Australie, e “La Bande di Sandro” e cjante e e fâs musiche ancje par furlan. No vin duncje podût fâ di mancul di cjapâ contats cul ideadôr Sandro Donati, cjamese blancje e cjapiel panama, che nus à contât la sô maraveose storie di emigrazion fate di antighis vilotis regjistradis de vôs de anziane mari, dai discs dai Arbe Garbe e di Glauco Venier, e dal sium di tornâ in Patrie invidât di Dario Zampa. Sandro nus à fevelât un pôc par furlan e un pôc par inglês. Dal talian, nissun segn.
Sandro, continus cemût che al è scomençât dut.
O soi nassût a Possec tal 1951 e cuant che o ai finît 5 agns o sin emigrâts a Melbourne. O soi cressût jenfri dôs culturis. In cjase a fevelavin par furlan, a mangjavin plats furlans e i nestri amîs a jerin i furlans dal Fogolâr Furlan, che gno pari al è stât un dai socis fondadôrs. Fûr di cjase invezit o jeri un australian.
E cuant âstu cjatade la musiche furlane?
Tai agns Setante, intun viaç che mi a puartât fin a New Orleans, par amôr dal jazz. O soi ancje passât pal Friûl: achì, pe prime volte, o ai cognossudis lis vilotis, cun jo e gno cusin a sgosâsi tes tratoriis. Mi visi di une volte a Resie che o vin fat tant di chel casin che a son rivâts fintremai i carabinîrs. Cuant che o soi tornât in Australie, lis vilotis a son restadis simpri cun me. Intant i miei fîs e i miei nevôts a continuavin a cressi furlans: e la musiche e je stade une part integrante de nestre culture. Ancje la mê femine Judy Jacques, une cjantante jazz e gospel cognossude, e cjante par furlan.
E cuant âstu decidût di sunâ la nestre musiche?
Cuant che a son muarts i miei viei o ai sintude fuarte la dibisugne di esprimi cheste part di me. Prime che mê mari e murìs le ai regjistrade intant che e recitave lis sôs poesiis furlanis che i plasevin di plui. Daspò o ai scrite la musiche e o ai dât vite a cjançons come omaç pe mê famee. Ai incuintris cui parincj al jere impussibil no cjantâlis ducj insieme. Lis vilotis a son restadis tai miei progjets musicâi cu “La Puarte Sierade”, sunade in stîl calypso e comparide tal 2000 intal disc di Barry Wratten e la sô Pelican Jazz Band di New Orleans.
“La Bande di Sandro” invezit cuant nassie?
Tal 2007. Intal repertori o ai metût dentri ancje une selezion di vilotis rangjadis cun ritmis caraibics e un tic di swing. O vin vût un grant sucès tant che o sin lâts indenant a regjistrâ chel che jo o clami “Progjet Friûl” par doi agns ancjemò. Purtrop il grant fûc dal Black Saturday bushfires (ai 7 di Fevrâr dal 2009) nus à causionât une vore di problemis. O vin finît di regjistrâ tal 2010.
Cemût âstu convinçût i tiei amîs a sunâ la musiche furlane?
Melbourne e je une citât maraveose e multiculturâl. Al è un grant interès viers lis diferencis. I miei musiciscj a sunavin za une vore di gjenars e di musichis dal mont, cussì a son stâts dome contents di imparâ ancje chês furlanis. E po dopo, ogni regjistrazion e jere acompagnade di une taule plene di ghiringhei e di vin furlan che a contribuivin a tirâ sù l’umôr.
E la rispueste dal public?
Fantastiche. Il progjet al è aromai vecjo di doi agns ma al è inmò vuê trasmetût de radio nazionâl. Chel altri an o vin sunât tal prestigjôs Recital Centre di Melbourne cu la Banditaliana di Riccardo Tesi par une schirie di concierts dal vîf trasmetûts de Australian Broadcasting Commission. E ancje i nestri ultins incuintris tai pubs a son plens di australians che a cjantin e a balin il “Friulian swing”!
I vuestris rapuarts cul Fogolâr locâl?
Strabons, nus à simpri sostignût. Di resint Dario Zampa al è vignût a Melbourne e al à dit che e sarès la pussibilitât di organizâ une visite in Friûl pal prossim an. Al sarès un sium, la ultime volte o soi vignût tal 2001 e cumò o ai une grande voie di tornâ.
Cualis sono lis tôs fonts musicâls dal Friûl?
“Villotte e Canti popolari del Friuli” e “O ce biel cjiiscjel a Udin”, “100 Canti del Friuli popolari e d’autore” soredut. Ma o cîr ancje di tignîmi in contat cu la musiche di vuê, par esempli o ai une colezion dai discs dai Arbe Garbe e di Glauco Venier.
Il toc che tu sês plui leât?
“Serenade (Tu âs doi voi)”. Al jere il preferît di mê mari: mi domandave simpri di cjantâlu par jê. Lu vin fat insieme une vore di voltis intant che e lotave cu la sô malatie.
Crodistu che il Friûl di vuê al sedi il stes di chel contât tes tôs cjançons?
O sai ben che i emigrants a puartin cun se un puest che al reste congjelât tai lôr cjâfs. Mê mari une volte che e jere tornade in visite e jere restade mâl de maniere che lis robis a jerin cambiadis, i sarès plasût che dut al fos restât compagn di cuant che e jere lade vie. Invezit jo o crôt che la culture e à di cressi e di svilupâsi, cence però sledrosâsi rispiet al passât. E la impuartance de diversitât linguistiche e je centrâl in chest sens. Chi o viôt i indigjens di Australie: a lotin pe lôr identitât ancje lotant pe lôr lenghe. O speri che ancje il gno “Progjet Friûl” al puedi contribuî in cualchi maniere ae culture musicâl contemporanie dai furlans dal mont. ■
Natascia Gargano