Sfuei Mensîl Furlan Indipendent
Archivi de Patrie

MUSICHE. Sandri Di Suald: “La vilote e la furlane particolaritâts furlanis: ecelencis di spindi”

............

Ce che nus covente e je une musiche furlane (plui) fuarte. Sandri Di Suald lu scriveve inte Patrie dal Friûl za tal 2007: «Che nô musicalmentri o vin tancj autôrs che a produsin musiche cualitativementri ecelente cun pôcs mieçs e che a rivin a peâ la lenghe furlane a une vore di esperiencis musicâls (melodichis, “rap”, “punk”…), ma che no vin une musiche furlane che e descrivi la nestre tiere e la nestre esperience umane cun dutis lis sôs valencis. L’ûs dal furlan al somee plui une etichete (ben fate) poiade però su prodots di altris». Di Sualdi al è publicitari di mistîr e al è ancje il pari di Tarvos, il prin fumut in marilenghe. I vin domandât, intal dibatit che o sin daûr a puartâ indenant in chestis pagjins su le nestre musiche e il rapuart cu la tradizion, cemût che o podin vê une musiche apont plui furlane. Seont lui nus mancje une esperience musicâl esemplâr, dal dut furlane. La musiche irlandese, al dîs par esempli, e je simpri musiche irlandese ancje se cjantade par inglês o par talian. Parcè chest no valial ancje pes cjançons in marilenghe? «E je un regole di comunicazion: un prodot par jessi ricognossibil, al à di jessi diferent di chei altris e al à di dâ emozions», al sclarìs. E nô, come che al conte, chestis dôs carateristichis lis vin, cu la vilote e ancjemò di plui cu la furlane. A son chestis lis nestris brisculis te sachete. «La vilote e à un retai incredibil, cuntune so specificititât clâre, come i viers in otonaris. E à ancje une funzion unificante, che e fâs grup, cu la sô ligrie», al continue Di Suald, «tal dì di vuè al è necessari promuovi un fenomen educatîf di recupar dai nestri cjants tai coros e, par me, ancje tes scuelis».
✽✽ Lino Straulino e Stefano Montello, che a son daûr a fâ un studi su lis vilotis, a disin che i nestris rappers a podaressin jessi i interpretis perfets par metisi a “repâ” in otonaris: «Il rap furlan nol è la soluzion a la musiche furlane moderne: al è un adatament che, tra l’altri, al sta lant a amont a nivel internazionâl e partant nol pues jessi neancje l’avignî de musiche furlane pur vint otims interpretis (come Tubet o Dek Ill Ceesa)», al comente, «lu viôt plui tant che sinergjie armoniche al cjant corâl e a la vilote rivisitadis che di chescj al conserve, sot cierts aspiets, lis intenzions».
✽✽ «Simpri a proposit di vilotis, no je nancje vere che la musiche popolâr no je inteletuâl. Baste pensâ a la finaline “perdonaitnus compatîtnus se cjantâ no vin savût…” che, oltri a une sô proprie bielece, e je in rapuart cu la sieridure dal “Dream” di Shakespeare. I grancj inteletuâi (D’Annunzio, Pasolini, Valeri…) le àn simpri valutade positivementri e capide la sô fonde. E je stade la “intelighenzia” taliane/furlane che e parone in dî di vuê a montâ il lûc comun de avilizion par diferenziâ in maniere negative i furlans e sotetâju politichementri (pensìn a la “damnatio memorie” dai celts o di Toni Savorgnan o di Jacopo Linussio, a la “dismenteance” di Michele Gortani, tant par fâ cualchi non)».
✽✽ E je dut câs la furlane, seont Di Suald, il nestri prodot di ponte, cu la fuarce dal so bal libar, vivarôs, cuasi salvadi. Al scriveve l’artist furlan Tita Marzuttini tal inizi dal Nûfcent che il furlan, al sun de furlane al sintive «una suggestione di ballare» e che al «resterà soggiogato da una forza che agisce sull’anima sua». La furlane e scjadenave reazions no dome in Patrie. Rivade a Vignesie e vuadagne notorietât e e fo di mode in Italie fint a rivâ a la corte di re Luîs XIV. «Parcè che a à alc che ti fâs sintî vîf, e je la tô anime che e salte fûr legre e incasinade. In origjin e jere violentissime, co si balave al lave dut a patràs», al dîs Sandri, «la furlane e à vude ancje declinazions coltis cun Bach e altris, e le balave ancje Giacomo Casanova. O vin duncje a disposizion une situazion uniche e emotivementri diferenziade. E no ven doprade! Jo o domandi une gnot de furlane come che e je la gnot de ‘taranta’».
✽✽ Insome la vilote e la furlane a puedin jessi dopradis, intune peraule, comercialmentri. Fevelìno di doprâ une strategjie di prodot pal nestri patrimoni storic? «Parcè no? Se une imagjin e valès mil peraulis, la musiche a ‘nt valarès un milion. Tu âs di vendi chel prodot ca. O vin di investî no a slas, ma cuntune strategjie precise. Come par ogni aziende, tu tachis cumò e ca di un pôcs di agns tu âs i risultâts. In Friûl o vin grups di ducj i gjenars, si trate di fâju dialogâ tra di lôr e di dî: invezit di fâ tantis manifestazions separadis, concentrìnsi, metìnsi insiemit, cjatìnsi par saltâ fûr cun ce che nus rapresentarà a nivel internazionâl. Ancje cui nestris emigrants tal forest che no spietin altri. Lôr a vuelin sintîsi furlans in maniere distintive, si à di costruî chest apostolât. Metint insiemit tradizion e modernitât, come che al diseve Gaudì. Al è cussì che si môf il marcjât. Se no fasìn cussì, no si rivarà a saltâ fûr de regjon e o larìn indenant a contâse tra di nô».
Natascia Gargano

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +