In chescj timps si torne a fevelâ di Universitât dal Friûl (malamentri clamade “di Udin”), nassude a sun di vitis daspò dal taramot. Cumò adiriture si rive a fevelâ di “collaborazione tra le tre università giuliane” (!?). Magari cussì no la memorie des personis e je curte. E alore a tornin fûr cuistions che a semeavin za superadis e risoltis. Rilei un toc di pre Antoni, cuant che la leç pe universitât dal Friûl si steve inmaneant, nus jude a capî cuâi che a jerin i problemis ancje di 40 agns indaûr. Sperìn che la storie nus judi a imparâ e no a dismenteâ. E dut al reste tes mans dai furlans, che no àn di pierdi ce che a fadie a àn cuistât.
pre Roman Michelotti
***
Comel, cun chê sô fate di gjesuit lât lai, al someave che al vaìs di contentece cuant che il so paron Andreot al à spampanât, cun intono a la grande, ce che l’Italie e veve savût fâ par chei cuatri macacos di Furlans. Par cualchi muart e cuatri claps, nus devin une autostrade, une ferade cun cuatri sinis, une mont sbusade fûr par fûr, 2.500 miliarts in cinc agns e une universitât!
I nestris “onorevui” (che onôr no ’nd àn di vendi gran) a puedin stâ contents: o vin l’universitât a Udin in gracie lôr. Sì, parcè che chê che a vevin domandât i furlans in 125.000 no je chê li, ma chê altre. Lôr nus dan chê che no fâs concorice a Triest. Anzit, par che Triest no se vedi par mâl, a rinfuarcin ancje la sô universitât. Si trate di cagneris (facoltà di scienze statistiche e attuariali, scuola superiore internazionale di fisica e matematica applicata, riconoscimento delle scuole interpreti e traduttori, riconoscimento del collegio del mondo unito, organizzazione dell’area per la ricerca scientifica e tecnologica), a preference di ce che nus dan a nô: lingue moderne e dell’Europa orientale, ingegneria ecologica e aziendale, scienze agrarie e dell’alimentazione. Trê facoltâts di nuie par nô e a Triest la zonte in plui di dutis chês facoltâts che a vevin prime.
In parlament no je ancjemò passade la leç, ma no larà vie trop che e passarà a pat che i Furlans no si decidin une buine volte che e je ore di finîle di vaî e di porconâ ta l’ostarie o sot la nape e che bisugne tornâ a cjapâ in man forcjis e palis e parâsi. Un popul, prin di murî, al à di tentâlis dutis, se al vûl murî almancul di om e no di coion.
O sin plui di mieç milion e il nestri vôt al val. I politics dal arc a san che il curtìs lu vin nô almancul ogni cuatri, cinc agns. L’an che al ven a son lis regjonâls e democristians e comuniscj e socialiscj a san che se la int si ingomee, e je finide par lôr. Par chest al è cumò il moment di dâsi dongje ducj chei che a àn a cûr l’avignî dal Friûl. Se no nus dan cumò l’universitât che nus covente e che, sacrament!, si mertìn, no le varìn mai plui e mai altri. Al è il moment di fâur pôre ai politics, di dîur in muse che, se a àn il coragjo di presentânus une universitât schifose come che nus e àn preparade, ju fasìn cori cu la forcje, dal prin al ultin. Si podaressin fâ nons, ma nol covente. Ducj a san che Tonut al à la bocje plui grande dal çurviel; che Toros al à fate lâ in vacje la mozion dal clero dal 1967 par taponâ lis porcariis dal so partît catolic; che Berzanti al è in parintât cui plui grancj mangjons triestins; che Bressani (cul so omonim galopin de curie, capelan de DC), nol à fat redenzie pal Friûl; che Comel si sbore di nô; che il Messagjero venit al è tignût sù di une mànie di int vendude ae mafie democristiane.
Ma no podaressino salvâsi cui comuniscj? Cul onorevul Colomba, cun Barcet e compagns? Ma lôr a àn altris problemis plui impuartants e no puedin pierdisi daûr cuistions di prestigjo, di nainis di cjampanili e cetera. Lôr a son universâi: dal Cile a la Spagne. Ce ur interessie dal Friûl?
O sin dacuardi cul sfuei che al à mandât fûr il Comitât pe Universitât Furlane: Se il parlament nol ricognossarà il dirit sacrisant dai Furlans di vê une universitât vere, nus tocjarà poiâ a plen, pes prossimis regjonâls e politichis, la liste furlane autonomiste. Che al vûl dî che i nestris vergognôs di parlamentârs e di conseîrs regjonâi no rapresentin il popul. E alore, fûr!
Patrie dal Friûl, n. 4/5, Avrîl/Mai 1977 ❚
pre Antoni Beline
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +