MUSICHE. Premi Friûl 2012

A son ustinâts. A tornin ancje chest an e a son fiduciôs di gjavâ fûr la miôr musiche tes lenghis minoritariis dal Friûl. La scuadre di Radio Onde Furlane, intal progjet Suns de ARLeF, e organize ancje pal 2012 il Premi Friûl, la plui impuartante manifestazion musicâl de nestre Patrie. E lu fâs di passe trente agns incà. Lino Straulino, Arbe Garbe, Dek Ill Cheesa, Luna e un Cuarto, par ricuardâ dome cualchidun. E di ultin, i zovins vincidôrs dal an passât, Ulisse e i Ciclopi, che a son daur a finî il lôr prin disc. Cui che al ven fûr di cheste kermesse nol sparìs ma di lui si sint fevelâ a dilunc. Ancje parcè che, par esempli, il vincidôr nol cjape bêçs, ma la pussibilitât di produzi un cd pe etichete Musiche Furlane Fuarte. «O sin simpri plui convints di cheste manifestazion», al conte Pauli Cantarut, president de radio, «a fevelin i risultâts: daspò di un moment tor metât dai agns doimil un pôc flaput, tai ultins agns a partecipin simpri plui personis e, une vore interessant, simpri plui zovins di etât. Il riscuintri, ancje pai events dongje dal premi, come il Liet e il Suns, al è grant. Insome la energjie no mancje dal sigûr nancje par chest an».
Cemût che al funzione_ Musiciscj, cjantautôrs, grups musicâi che a vedin une cjançon par furlan o intune altre lenghe minorizade dal Friûl che no duri plui di cinc minûts, a àn timp fin ai 15 di Jugn par partecipâ. Il bant al è online cun ducj i detais (www.ondefurlane.eu/premi-friul-2012). La jurie e sielzarà di 3 a 6 grups o cjantants che ai 28 di Lui a sunaran dal vîf par 15/20 minûts intant de finâl, alì dal Homepage Festival tal Parc dal Cormôr di Udin.
Une novitât: il jingle_ Cheste e je le gnove dal 2012: dongje de sezion musiche a ‘nd è une pai jingles radiofonics. «O vin voie di rinovâ la radio, cussì o vin pensât di coinvolzi ancje i nestri scoltadôrs, musiciscj, produtôrs, propit par fa partecipâ la int ae gnove muse de radio», nus à dit inmò Cantarut. Cui che al vûl al pues duncje ancje mandâ un gnûf jingle (di no plui di 30 seconts) pe Radio Onde Furlane. La idee miôr e sarà premiade cuntun iPad, simpri ai 28 di Lui alì dal Parc dal Cormôr, intant de finâl. ■
Natascia Gargano