Lis vilotis a sunin par simpri
“Maraveis de tiere” al è il titul voltât par furlan di un conciert sinfonic su temis musicâi dal dut furlans, in trê moviments. E je une opare musicâl scrite dal pianist e compositôr furlan Carlo Corazza, origjinari di Pordenon, che al vîf a Udin dopo vê studiât a Gurize e zirât ator pal Friûl e pal mont. Trê moviments: “Rivocs de tiere”, “Maravee” e “La tiere e cjante”. E je la nestre biele Patrie che si conte midiant dai sunôrs miscliçâts tra melodiis antighis de nestre storie e ideis musicâls gnovis. Un lavôr seri e tant curât, fat cun cussience e delicatece, un spieli dal caratar e de personalitât dal autôr, sensibil e brâf musicist che al met cun passion la sô maestrie al servizi de bielece.
◆ No si trate di un lavôr jessût fûr cussì par câs, ma di une operazion curade e coltivade tal timp, une vore certosine che e met dacuardi lis antighis formulis musicâls dutis furlanis – al baste dome pensâ a une cualsisei melodie di vilote – cu la contemporaneitât, par un lavôr fat di gale e cun tante cure. Tant di cjapiel a Carlo Corazza, musicist sensibil e une vore preparât, che al nol à molât di fâ musiche ancje se il destin lu à costret a riviodi la sô cariere, par vie de malatie di Lyme che e lu à cjapât daspò di une punture di cecje diviers agns fa, obleantlu a meti di bande i tancj concierts di une cariere ben inviade e a riviodi la sô vite di om e di artist. Cûr di aur, sensibilitât a chilos e tante voie e passion, tant che il professôr Corazza, insegnant zovin e ben amât da students e coleghis, di ciert nol à sierât te cantine la musiche e il pianoforte. Dut altri, al à ben fat e pensât di sburtâ fûr la sô musiche e creativitât cul inzen propri di un di chenti. Dopo il cd jessût di pôc “Dreamer’s landscape”, che si è vuadagnât tra l’altri la medaie di arint ai Global Music Awards in Californie, tant di cjapiel e dut meretât, cumò al ven fûr chest lavôr dut furlan, che al scrutine in forme creative, cence nuie profitâ, pluitost esaltâ, lis carateristichis puris de nestre musiche che e cjate intes formis classichis il mût di fâsi origjinâl. Il secont moviment di cheste opare serie e ben pensade, come che si à dit, si clame “Maravee”. Un toc che Carlo Corazza al veve bielzà scrit diviers agns fa e che al à zirât il mont, cun plui di trente esecuzions pal moment, eseguît insiemi cu la flautiste Luisa Sello cuntun sucès garantît, in orient e ocident, e diviersis trascrizions par variis organics strumentâi. Nus conte il stes autôr: «Si trate di patrimonis unics, che a meretin dut il rispiet e tal stes timp a son une font di ispirazion cence precedents. Scoltâ lis vilotis antighis al vûl dî cjatâ ispirazion pe musiche gnove. Ancje un altri toc che o ai scrit, o tornât a scrivi, suntune cjantose cognossude, “Riflès di un timp”, mi à dât tant ce fâ e di pensâ. Al è facil colâ in trascrizions banâls, revisions o riscrituris scontadis o inmò piês che a ruvinin l’origjinâl. Il lavôr che o ai fat par un ensemble di flâts su chest patrimoni musicâl, al à lassât ducj contents, sedi i musiciscj, contents di viodi voltât un toc storic in maniere contemporanie, sedi il public, curiôs e content di tornâ a sintî une melodie cognossude intune forme dute gnove». Inmò di plui al à fat Carlo Corazza. Al à miscliçât une altre vilote, “E tu Pieri cjol Anute”, cuntun ritmi african. Operazion riscjose ma ben riessude e che à zirât ancje cheste ator pal mont. «La sperance tal scrivi chest toc e jere di rivâ a fâ capî che la ricjece vere, intune epoche di globalizazion, e je inte valorizazion des culturis e intes lôr relazions, cun formis di comunicazion che a rispietin lis culturis reciprochis ».
◆ I doi moviments che a restin di contâ e che a struturin il toc sinfonic “Maraveis de tiere” a son nassûts cu la stesse passion pe tradizion e, tal stes timp, cu la voie di inovazion che Corazza al à dentri di nature. Ancje chescj, come il prin, a son scrits par orchestre di cjamare, cun arcs, flâts, cuar, trombe, percussions e pianoforte. Componûts intant che al bateve dûr il Covid-19. «Il “ferme dut” di cheste epidemie, mi à dât stranementri la calme di meti a fûc lis ideis che o vevi tal cjâf di tant timp. O volevi fâ un grant omaç aes vilotis, composizions bielononis bielzà di lôr, e cuntun potenziâl dentri cence paragons. Lis ai tant studiadis e selezionadis par fâ in mût di dissegnâ une partidure che e fos buine di tignîlis dongje e di valorizâlis.
◆ Chest conciert sinfonic “Maraveis de tiere”, al ten dentri dut un patrimoni di cjants, melodiis e peraulis plenis di vite. La opare e à dentri cuindis tra bai, cjantosis e vilotis furlanis, fondudis cun soluzion di continuitât. Tant che “Stelutis alpinis”, “Ave, o Vergjine, us saludi”, “O cjampanis de sabide sere”, “La staiare” di Zardini, “L’arboscello”, “Putta nera”, “L’antica furlana campestre”, “Schiarazule marazule” di Mainerio, “Ce bielis maninis”, la staiare “Tintine Tintone”, “O ai preât la biele stele”, ” E tu Pieri cjol Anute”, “Al cjante il gjal”. No si viôt la ore di scoltâ cheste composizion par intîr e dal vîf. ❚