Sfuei Mensîl Furlan Indipendent
Archivi de Patrie

MUSICHE. La opare dal mestri Rodolfo Kubik pe prime volte in sene

Natascia Gargano

«Va vilote puartade dal vint» e je une “comedie musicâl furlane in doi ats e trê cuadris” – cemût che al sclarìs il sottitul – che e rive in Patrie vinars ai 30 di Mai aes 20.45 lì dal Teatri Gnûf «Giovanni da Udine» pe sô prime rapresentazion integrâl europeane. La opare dal mestri Rodolfo Kubik, prodote dal grup folkloristic “Chino Ermacora” di Tarcint, e conte la storie di une famee furlane in Americhe e e fevele di emigrazion e di amôr cu la gracie des vilotis e dai cjantis popolârs de Argentine. La fuarce dal spetacul si cjate propit inte capacitât dal autôr di meti adun lis melodiis des vilotis di chenti cui ritmis argjentins, il dut graziis a lis regulis armonichis de dodecafonie, dulà che il popolâr si messede benon al cult. Ma cui jerial Rodolfo Kubik? No ducj lu cognossin in Friûl (un motîf di plui par lâ a viodi il spetacul), ma famôs in Argjentine, al nas a Pule tal 1901. Il pari, Guglielmo, al è un venit di origjin ceche (di chi il cognom) e la mari, Giovanna Calligaris, e je di Roncjis di Monfalcon. Tal 1917, co al à a pene 16 agns, al insegne oboe, flaut e clarinet intal cjamp sfolâts di Wagna, in Stirie. Tal 1919 si iscrîf al Conservatori «Tartini» di Triest sot la vuide dal mestri Antonio Illersberg. Tal 1923 al va a Viene, dulà che al finìs di studiâ, al impare la dodecafonie e al studie con personalitâts famosis come Arnold Schœnberg. Al torne duncje in Friûl par fâ e insegnâ musiche ma, a cause de situazion politiche, tal 1927, a 26 agns, si trasferìs in Argjentine, dulà che al passarà la sô vite. Chi di nô la opare «Va vilote puartade dal vint» e je stade za proponude plui voltis, ma simpri in forme antologjiche, ven a stâi puartant in sene dome cualchi toc selezionât. In cheste ocasion, il sfuarc di alestiment inte sô interece al è une vore impuartant: a son 14 cjantants soliscj, 8 ators, 8 danzadôrs, 70 coriscj, 18 etnodanzadôrs, 50 orchestrâi, e 12 tecnics, plui o mancul dusinte personis in dut. A sunin la orchestre «I Sinfonici del Friuli Venezia Giulia» e i maestris dal «Konservatorij za Glasbo & Balet» di Ljubljana. Il diretôr di orchestre al è il belunês Fabrizio Da Ros e il regjist il roman Gianmaria Romagnoli. Apontament duncje a fin dal mês, fasintnus puartâ vie lontan cul vint cu la stesse lizerece e fuarce de vilote traspuartade pal mont insiemit cu lis comunitâts furlanis. ❚
Natascia Gargano

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +