Sfuei Mensîl Furlan Indipendent
Archivi de Patrie

MUSICHE. Federico Tavan al cjante cui FLK

............

Cui che al à vût il plasê di jessi ae Glesie di San Francesc a Udin ai 13 di Mai sotsere al à podût gjoldi di un spetacul cuasi epic. I Flk, Cristina Mauro ae vôs, Stefano Montello ae ghitare, Flavio Zanier al cuintribàs, Alessandro Montello al piano e Loris Luise aes percussions, che a tornin insiemit suntun palc cun musiche inedite (no lu fasevin dal 2007, lôr che in 25 agns a àn butât fûr a pene 5 discs). E che a susin lis peraulis di Federico Tavan, il poete di Andreis muart tal Novembar passât. «Al jere za tal aiar che o vevin voie di fâ alc insiemit, ma no vevin mai cumbinât» al dîs Stefano Montello «po e je rivade cheste ocasion e lis ideiis lassadis a metât si son metudis adun intun colp». E cussì a nassin 4 tocs inedits preparâts sui tescj di Tavan, in version acustiche: ghitare, cuintribàs, percussions, piano e vôs. Nuie di plui. La serade “Nostra preziosa eresia” e je stade organizade dal Comun di Udin e condote di Paolo Medeossi te suaze de rassegne Vicino/Lontano 2014, con ancje leturis di Aida Talliente; une performance dal Teatrino del Rifo su tescj di Tavan; proiezions di videos origjinâi e fotos di Danilo De Marco; e musichis di Bande Tzingare.
Al è dal 1997 il secont disc dai Flk Re Noir, che al fevele dal om scûr o, miôr, de part scure dal om. Vôs in cjamp, propite la sô. Chê di Tavan. «Lu metarai come epitaffio su la mê tombe» i à dît une volte a Montello te orele, imbraçantlu e vaint come un frut. Sì, parcè che jenfri i musiciscj e il poete no jere dome stime o passion comun pe art e pe musiche. Ma amicizie vere. «Lu ai viodût pe prime volte tal ex manicomi di Palme. Al faseve performance improvisadis con Aldo Colonnello» al conte Montello «par nô al fo folgorant. E di chê volte no si sin plui lassâts». Cussì a tachin a frecuentâsi: Federico al cjapave la coriere, al rivave fint a Manià o a Montreâl cuntun passaç (cui no jal davial?) e po vie ator «a fâ putiferio» cuntune 127 scassade di Stefano e so fradi Alessandro. «Stâ cun lui al jere devastant, ti stracave, ma tal stes timp di dave une fuarce vitâl» al ricuarde «co o lavin sù a Andreis – e la strade de Valceline no jere inmò! – bastave lâ inte ostarie dal paîs e lui si meteve fûr dal so balcon in plaçute come un pape».
Federico nol jere facil, come chê volte che al jere lât ospit al Maurizio Costanzo Show e une volte tornât cjase al lave ator berlant che lui al jere il plui grant poete furlan vivent. E poi «ti tocjave, ti faseve doimil domandis, ti ripeteve lis robis al sfiniment» al dîs Stefano «ma al veve la bielece dai fruts, cence costrizions e viis di miec. E ancje se al veve un dolôr che al puartave dentri cun se ogni dì, al jere un amant de vite. Nol jere un mat, ma dome un melanconic, un che al veve viodût la amarece de vite». Cun chest omaç, che al puarte in sene lis peraulis dal poete des pantianis, i Flk a àn volût celebrâ un amì ma ancje «un periodi storic, chel dai agns ’90, che in Friûl al è stât rivoluzionari». L’omaç a Tavan al continue a Pordenon, sabide ai 31 di Mai e domenie al Prin di Jugn: 36 oris di spetacul jenfri lis viis dal centri citât e il parc machinis comunâl di vie Vallona. Simpri fat «cuntune gruesse ridade, cemût che i plaseve a lui». ❚
Natascia Gargano

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +