MUSICHE. Il rock furlan a Xixón

Cuant che no tu tes spietis, lis robis a sucedin. Lôr a vevin molât di un pôc il colp o, almancul, si jerin metûts in stand-by. Un al à vût un frutin, chel altri si è maridât, e insome i JoNoKognos  no sunavin plui di cuasi doi agns. Po dopo, il sugjeriment di cualchidun: parcè no partecipaiso a Suns, il festival european de cjançon in lenghe minoritarie, che lu fasin a Udin? “Intant o ai dit di sì, e po dopo o ai domandât a di chei altris”, nus à contât Luca D’Angela, 34 agns, vôs e ghitare dal grup di Codroip. “O jeri sigûr che a varessin dit di sì”.
E cussì, ai 2 di Novembar li dal Teatri Palamostre, ju vin viodûts su pal palc cul toc “Mai Mai” in rapresentance de minorance furlane (insieme cui cjargnei Mig29OverDisneyland). “No lu vevin pratichementri nancje dit ai amîs, ma chê sere o vin cjatât une vore di personis in sale che nus àn supuartât. Par nô e je stade une vere sorprese”. Une sorprese sul seri, parcè che i JoNoKognos “redivîfs”e un poc “inrusinîts” – come che a àn dit lôr stes – a àn vinçût il premi dal public. Insome, a son stâts “freâts”: cumò ur tocje scjaldâ benon i struments e fâ lis valîs. Suns, di fat, al da dirit di partecipâ ae serade finâl dal festival, ven a stâi il Liet 2012 che si davuelzarà al prin di Dicembar a Gijón/Xixón, tes Asturiis. Intant che o scrivìn, no savìn ancjemò il non dal vincidôr, ma o savìn di sigûr che cheste e sarà la lôr prin volte tal forest, dulà che a varessin gust di esibîsi “ancje intune placute o intun bar fûr dal festival, par viodi l’efiet che al fâs tal public il furlan sunât là vie”.
Il grup al nas tal 2001 e al è vincidôr dal Premi Friûl tal 2002, un prin disc ‘Liendis’ e un altri tal 2007 ‘Discolç’ (ducj i doi cu la etichete Musiche Furlane Fuarte). Chest an a fiestezin duncje il decenâl e ur augurìn che al sedi di bon auspici. Il stes toc che a presentin, Mai Mai, al è un test riflessîf, che al fâs cussì: Une lûs si impiarà sui agns, su chel om che tu crodevis di sei o sul om che nol vâl plui nuie. Intant, si son cjatâts come un timp li de sale prove a cjase di Stefano Locatelli, il baterist (chei altris a son Mauro Pontisso al bas, Simone Mariotti ae ghitare e Luca Morassutti aes percussions), prime di montâ suntun avion direzion Asturiis a fâ fieste. “No masse però, lis feminis nus tegnin di voli: a àn metudis lis telecjamaris in zîr”, al dîs Luca. E no par ridi: cui JoNoKognos si son imbarcjâts ancje Marco D’Agostini e Claudio Cescutti: testemoneancis audiovisivis coming soon! ■
Natascia Gargano