MUSEUS. La passion di un imprenditôr deventade museu

La prime robe che e impressione cui che al visite la colezion Tonutti a Remanzâs e je la “cuantitât” di machinis, imprescj, salis che si slungjin dilunc de visite, une racuelte di materiâi che e lasse cence flât.
In chest museu si à pardabon la sensazion di fâ un viaç indaûr tal timp pai curtîi o pes ariis di une volte, dulà che ducj a vevin une vore di imprescj agricui, dulà che la vite si davualzeve ai ritmis de nature, cui rumôrs dal lavôr contadin.
Dut chest materiâl al è stât tirât dongje dal cav. Gino Tonutti e de sô famee dilunc dai agns, in face di une passion grandonone pal lavôr che lui al clamave “la malatie pal fier”.
LA FAMEE TONUTTI_ La storie de famee Tonutti e nas tal 1864 cuant che il von Luigi al invià la ativitât di batifier a Marsure disore; chi al faseve imprescj agricui che po dopo al vendeve ator par dut il Friûl, tant che lu clamarin “mestri Vigji”. Cul lâ dal timp Luigi al insegnà il mistîr ancje ai siei 5 fîs e insiemi a rivarin a comprâ un mulin vieri a Marsure disot che a faserin deventâ une oficine ben inviade e cognossude in dut il Friûl.
Deventâts adults i fîs di Luigi si separarin ma ognidun al continuà cu la ativitât imparade in famee: in particolâr Umberto, che al sarà il pari di Luigi e Gino, si trasferì tal comun di Remanzâs, te localitât che dopo e cjaparà il non di Batifier di Sot. Al sarà chi che daspò dal 1965 il cav. Gino Tonutti, ferbint imprenditôr, al inviarà la sô ativitât su scjale industriâl.
IL MUSEU_ La grande passion di Gino Tonutti pe produzion di machinis agriculis e imprescj lu à puartât tor de metât dai agns Sessante a tirà dongje ogni sorte di materiâl mecanic, scomençant des motos; la sô colezion di fat e scomençà cuntune Guzzi 500 dal 1923, che Gino al metè a puest cul jutori di un ex dipendent.
Vuê il museu si divît in cuatri sezions: il batifier, il repart agricul, la sezion des machinis vieris fin ai nestris timps e in fin chê des motos di epoche.
La prime sezion, chê dal batifier, e je la piçule farie daspò deventade une vere e proprie industrie, che inmò in dì di vuê e à mantignût l’ambient origjinâl, cul paviment di tiere batude, grancj barcons e sui mûrs neris inmò la olme evidente di agns di lavorazion dal fier. Chi si cjatin imprescj dal inizi dal secul passât, foradôrs a man, tornis e adiriture un mai inmò funzionant che si moveve cu la fuarce idrauliche de roie che e cor in bande de oficine.
Se si pense al Friûl dal Votcent e dai prins dal Nûfcent, dulà che la vite e jere segnade dal lavôr dai cjamps, si pues ben imagjinâ ce che a àn di jessi stadis la creazion e la produzion di imprescj agricui, sodisfâ cetantis domandis che a vignivin di dut il teritori e inovâ la ricercje e la produzion e je stade dal sigûr la fortune de famee Tonutti, che e à savût cun grant lavôr e inteligjence puartâ indevant tai decenis.
IL REPART AGRICUL_ La seconde sezion e mostre no dome imprescj agricui e rurâls ma ancje la evoluzion des tecnichis e de mecanizazion dal lavôr agricul, come la machine par discartossâ lis panolis, la machine par specolâ pai cereâi; al impressione un model di locomotive a vapôr colegade a une machine par imbalâ e a la trebie inmò funzionant dal 1930. Dal stes an si cjate ancje une machine par gjavâ la galete dai cavalîrs, une altre testemoneance des ativitâts prevalentis tal nestri teritori.
Ma o vin viodût che la passion di Gino Tonutti si slargjave ancje a lis motos di epoche e a lis machinis, passion puartade indevant inmò in dì di vuê dal fi Carlo e dai nevôts.
Desenis di modei dai prins dal Nûfcent fint a modernis Lamborghini e Ferrari, come pes motos di epoche dai agns Vincj fin ai agns Novante, Guzzi, Gilera e Harley Davidson.
Dut chest duncje si lu pues visitâ tal museu in comun di Remanzâs, tra Orçan e Selvis, daspò de sô scree tal 1997. Vuê la esposizion e je mantignude cun finanziaments privâts dal fi Carlo Tonutti, de  brût Emanuela e dai nevôts Gianmaria e Fulvio, che cun braure a puartin indevant la tradizion dal nono.
UNE PARTICOLARITÂT_ Vuê il museu al conte uns 800-1000 visitis ad an, soredut de Austrie, invezit a son inmò pocjis lis scuelis che a vegnin a tocjâ cun man ce che al jere il lavôr dai nons, a visitâ une realtât che miôr di altris e pues fânus sintî ce che al jere il mistîr dai cjamps e la fadie di jessi contadins. ■
Venusia Dominici