MUSEU. Lis tradizions dal Friûl ocidentâl

Za dome il paîs di S.Vît dal Tiliment al merte dal sigûr une visite, cu la sô impostazion medievâl, il borc centrâl contornât des muris e lis trê toratis inmò ben conservadis. Za Girolamo di Porcie te descriptio de Patrie dal Friûl dal secul XVI le identifiche tant che “un dai centris urbans plui biei e impuartants no dome dal Friûl, ma ancje de Marcje trevisane”.
Tal centri de citadine, ben inserît in chest contest storic, si cjate la sede principâl dal museu de vite contadine “Diogene Penzi”, o ben il palaç Altan.
LA RÊT MUSEÂL DI PORDENON_ Il circuit provinciâl dai museus però nol à dome la sede di San Vît, di fat la tipologjie e la cuantitât di bens tirâts dongje a àn permetût di distribuî lis racueltis in plui sedis, vignint a creâ cussì un museu slargjât sul teritori.
Cui che al visite Palaç Altan duncje, al pues continuâ il so percors culturâl ancje ta chês altris tapis museâls, discuvierzint intun lunc percors la nestre civiltât secolâr.
MANIÀ_ A Manià di fat, li de ex filande si cjatin lis sezions museâls dedicadis a lis lavorazions artesanâls dal len e dal fier, cence dismenteâ ancje la racuelte impuartante de produzion dai curtìs.
CJAVÀS_ Lant a Cjavàs, tal Palaç Polcenic-Fane, e je une sezion che e mostre i aspiets materiâi e lis formis socio-culturâls de emigrazion dal Friûl ocidentâl par ogni bande dal mont.
BAGNAROLE_ Culì si cjate in mostre la fabriche di une vecje see ative te plane di Pordenon, che si integre cun altris dôs bielis realtâts etnografichis de provincie: il Museu de Cjase clautane, che za tal non al puarte la sô testemoneance de storie de comunitât locâl, ma dedicade ancje al recupar di struturis vecjis come la “ciasa da fum”, dimore antighe tipiche dal cjanâl de Ciline; e ae fin il Museu civic de Civiltât Contadine di Andreis, che al mostre lis lavorazions dai scarpets, dal vues, dai çucui, de lane, dal lat e lis mascaris antighis pal carnevâl e i zûcs dai fruts.
Une ufierte culturâl pardabon grande che no lasse il visitadôr sierât intune uniche realtât, ma che lu puarte a vivi lis testemoneancis de civiltât contadine locâl a spas pal teritori.
Ma tornìn a S.Vît par fevelâ de sede principâl de rêt museâl.
PALAÇ ALTAN_ Come che si diseve il palaç, cu la sô storie secolâr, al fo di proprietât par agnorums de famee nobile dai Altan che lu comprà tal ‘600 e che ben a planc lu fasè deventâ, dilà di une dimore signorîl, un centri di gjestion des proprietâts agriculis de famee. Tal secul passât i spazis dedicâts ai orts, a la cantine e a la vigne a forin trasformâts in zardins. Un biel contribût su la storie dal palaç e lis sôs mudazions si lu cjate su “La Panarie” (n. 134, 2002).
LA COLEZION_ La esposizion e je disponude su doi plans pardabon ben alestîts, une vore curâts e cun ogjets origjinâi tirâts dongje, a scomençâ dal 1950, dal prof. Diogene Penzi, che al da il non al museu, studiôs di tradizions e passionât di storie contadine.
I ogjets a son dividûts par temis (cusine, cjamare, il vistî de int, mistîrs, zûcs pai fruts e v.i.) e ognidun al è ripuartât tun catalic dulà che si spieghe la lôr funzion e il lôr non origjinâl par furlan (pal plui tes variantis locâls); la lenghe furlane e podarès jessi doprade ancje te cartelonistiche, par no rindile masse leade dome a un aspiet aulic e aromai passât, fat di suns che no si sintin plui, ma un biel lavôr al è dut câs stât fat te ricercje e riproposizion dai nons dai ogjets.
Lis sezions a son tantis, cun particolâr atenzion a lis usancis dal Friûl ocidentâl e de pedemontane, cussì come pai zûcs doprâts dai fruts: comoventis lis nainis trascritis tes variantis locâls che a mostrin trop che il furlan, che in dì di vuê no si sint a fevelâ pes stradis dal paîs, e jere lenghe di famee. ■
ORARIS DI VISITE
Museu provinciâl de Vite Contadine “Diogene Penzi”
S.Vît dal Tiliment
Palaç Altan, vie Altan 49
tel. 0434 833275
Oraris: dal lunis al vinars des 9.00 aes 12.30. ■
Venusia Dominici