Sfuei Mensîl Furlan Indipendent
Archivi de Patrie

LETARE. Rispueste al editoriâl di Dree Valcic su La Patrie di Otubar 2012

Marc De Agostini e Adrian Cescje

Preseât amì Dree Valcic,
in relazion al to editoriâl su la Patrie dal numar passât “E je ore di sentâsi in taule”, si permetìn di dîti che il riferiment a la mangjative no nus è plasût propit.
Tal câs in cuistion l’argoment al è seri: ni brusadulis, ni luianie, ni torte di spartî. Nol è nuie ce mangjâ.
A proposit di taulis, la taule dal Moviment Friûl e je simpri stade taronde come chê di Re Artù, ma come in chê di Re Artù si sentavin par just dirit i cavalîrs che a valevin.
Tal nestri câs cavalîrs che a valin a son ducj chei che si puedin identificâ par autonomiscj autentics a 360 grâts.
Masse di lôr si disin autonomiscj dome su cuistions particolârs, contingjentis, personâls o fintremai corporativis, ma no sot ogni face.
Par semplificâ si pues riclamâ autonomie par dîsi di no a la TAV, al eletrodot, a lis cassis sul Tiliment, a la discjarie da pît dal ort, ae piste ciclabile, ae soste vietade sot di cjase e v.i., ma no riclamâle par altris cuistions fondamentâls par che al vivi il Friûl, par esempli la lenghe, la universitât, la unitât dal Friûl, la resistence al nazionalisim di Stât che le fâs ancjemò di paron…
Dut câs, se ti interesse la nestre posizion, vele ca, te mandìn in zonte.
Mandi.
Marc De Agostini e Adrian Cescje

Al è propit tant curiôs e une vore interessant il fat che, a pene che si ipotize une tornade su la sene politiche-istituzionâl, daspò 20 agns di sospension, dal Moviment Friûl, e cun di plui competidôr potenziâl aes elezions regjonâls prossimis dal 2013, si scjadenin di bot tantis reazions. In primis di bande di chei che in chescj agns si son caraterizâts par une azion di negazion de esistence stesse dal MF, e par vêlu simpri esorcizât.
[…]
Nissune di chestis ‘vôs di alt nivel’ e à mostrât di seisi domandade prin e cun onestât cualis che a podaressin sei lis veris motivazions che a sburtaressin i ‘custodis’ dal partît dal autonomisim storic a fâ che e barlumi la ipotesi di une tornade dal simbul dal Moviment Friûl te competizion eletorâl pal rinovament dal Consei regjonâl dal an cu ven: se par câs chest al dipent de necessitât di tornâ a combati par une autonomie tradide o che e continue a sei tradide, e cualis che a saressin lis motivazions specifichis plui palesis che lu dimostrin. No! Si son preocupâts di altri. In cuale schirie, tra lis dôs principâls, che al varès vût di intropâsi! O di ce rapuart che o varessin vût di tiessi cun cierts ‘personaçs in etât’ e cun ‘cierte zoventût’ che si definìs autonomiste o che cussì e je presentade. Tal prin câs si trate di personaçs che tai timps che l’MF si bateve, dibessôl, pe autonomie dal Friûl e pai siei dirits primaris, a nadavin contents te melasse democristiane o a restavin fers al ‘verbum’ de centralitât dal lôr partît, tal stes moment che il furlan al veve di restâ chel des vilotis. Tal secont câs si trate di zovins tant ferbints, morbits e magari plens di volontât, tant che a àn pocje disposizion a dimostrâ lis lôr capacitâts, il lôr nivel di afidabilitât furlaniste, di onestât di intenzion, cu la umiltât necessarie (la stesse che e fo domandade a noaltris cuant che e vignì la nestre volte) ai sôi politics titolâts a garantî la continuitât tra l’autonomisim storic e chel ‘gnûf’ che vuê al covente, ven a stâi a chei che a custodissin il Moviment Friûl, lis sôs ideis, la sô azion storiche e lis sôs memoriis.
[…]
Ve che alore il Moviment Friûl al è ancjemò chi a riproponi il so program autonomist, di rimozion des injustiziis storichis e resintis a dam dal Friûl, al cîr di fâlu indreçantsi in primis a chei furlans che si ricognossin te aree culturâl-ideologjiche progressiste e libertarie, clamantju a fâ bloc o masse, no dome critiche ma … di sfondament, tal stes moment che si garantìs la sô autonomie di azion tal mieç de sene politiche.
Che a esistin altris fuarcis politichis ‘plui organizadis e cualificadis’, di çampe, di diestre o neoautonomistis in cundizion di sostituî il Moviment Friûl in cheste azion di liberazion a noaltris nol pâr propit. Magari cussì no! In dute francjece, no ricognossìn fuarcis politichis organizadis di diestre o di çampe par inviâ cun lôr un dialic par un program di azion comune. No lis viodìn. O viodìn sogjets che a crodin pardabon ae cause autonomiste e ‘ndi viodìn di altris che a nasin che la cause autonomiste e pues sei un optional in plui par rivâ un puest inte politiche regjonâl. Ai prins o sin disponibii e pronts a lassâ spazi e, se al è il câs, a cedi ancje il pas, ma o disìn ben clâr che la ‘gnove gjenerazion’ di autonomiscj e pues vê prospetivis ‘altis’ dome se si invie su la strade segnade dal MF, in continuitât cul MF e, par chel che al covente, e acete di sei valuade dal MF. Ai seconts  o disìn che lis lôr ambizions no nus interessin e al è miôr che a ledin pe lôr strade.
[…]
Rivâts a cheste conclusion o si rassegnisi o, fate constatazion che se in 20 agns a fossin stadis personis e organizazions in cundizion di sostituî il MF par fâ miôr di ce che il MF al veve fat, chest al sarès za sucedût, nol reste che meti denant dai Furlans la ipotesi che il Moviment Friûl al torni a presentâsi. O sin convints che no sedin altris soluzions, massime in moments tant che chescj.
Che si rivi po a presentâ pardabon lis listis dal MF aes elezions regjonâls dal 2013 al è un altri discors. Al va dit, in fats, che dal 1993 lis fuarcis politichis di diestre, di çampe e la Lega Nord, cuntune volontât e responsabilitât che a passin dutis par traviers, si son metudis in cunvigne par meti dongje une leç eletorâl ad excludendum, fate in maniere di fâ deventâ se no impussibile, une vore dificoltose la semplice partecipazions aes elezions par chei partîts o grups etnics che no son za in Consei regjonâl. Di vôs che a rivin al pâr che si dedin da fâ par meti dongje ancjemò dificoltâts e gnûfs sbaraments.
[…]
Dit chest, pal rest il Moviment Friûl al sa ce fâ, daûr dal jutori che i vignarà di chei che autonomiscj intor pal Friûl a son pardabon.
Marc De Agostini e Adrian Cescje

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +