MUSEU. Acuari, nature, paisaç: lis bielecis di Ariis di Rivignan

O vin volût fevelâ dal acuari di Ariis, dongje Rivignan, parcè che intun unic puest si conciliin nature, faune e specialitât tipiche dal nestri teritori.
Intun percors espositîf, inserît tun contest naturalistic, si puedin di fat scuvierzi tantis particolaritâts sedi dal ambient acuatic che teritoriâl.
La prime sede dal acuari di Ariis e fo vierte tal 1999 cul fin di deventâ centri di riferiment didatic pe cognossince dai ambients di aghe, cussì fondamentâi tal nestri teritori; cul timp e je deventade mete simpri plui preseade soredut des scuelis che chi a puedin sperimentâ un percors didatic cu la presince di un biolic che al spieghe il disvilup idrografic de regjon.
IL GNÛF ACUARI_ Par slargjâ la ufierte formative tai agns si è decidût di rinovâ la sede espositive cun gnovis vaschis e spazis par proiezions di filmâts. Al è nassût cussì il gnûf acuari, inaugurât tal mês di Març dal 2009 e gjestît dal “Ente tutela pesca del Friuli-Venezia Giulia”, e che al è cressût insiemi al numar di visitadôrs che ogni an a vegnin a Ariis (cirche 20.000) par discuvierzi un gnûf aspiet de biodiversitât furlane.
La faune itiche de regjon e conte 52 speciis, di chês il 70% a son autoctonis; tal acuari di Ariis al è pussibil cognossi ben 40 di chestis speciis, inseridis tes vaschis espositivis tignint cont de lôr specialitât e ricreant l’ambient naturâl dulà che a vivin.
Ma no dome: tal acuari al è stât ancje ricreât il cors di un flum de sorgjent fint te fôs, passant dal paisaç di montagne, al cors di planure, a la zone des risultivis fint a la part finâl di aghe salmastre. Chest par mostrâ, ai fruts ma no dome, trop vari che al è l’ambient furlan, che in pôcs chilometris al passe de mont al mâr traviersant tancj paisaçs.
La ricostruzion e je stade pussibile in gracie di une tecniche specializade te riproduzion di materiâl di clap: il stamp des pieris di fat al è stât cjapât propit dilunc di chês veris jù pal cors di aghe e tornadis a costruî in laboratori cun polvar di clap e resine; ae fin i tocs a son stâts metûts dongje tal acuari cuntun grant lavôr di pazience. Il risultât al è stât pardabon straordenari e su chest font si à ufiert un supuart naturâl dulà fâ cjapâ la vegjetazion par implementâ lis ambientazions.
IL PERCORS NATURALISTIC_ No bisugne dismenteâ però che l’acuari al è inserît intun ambient naturalistic cetant preseât che, pensât pe prime volte tai agns Cincuante, al mostre un biel esempli di struture inseride in maniere armoniose tal ambient.
La presince dal flum Stele di fat e cree za di bessole un paisaç unic che si preste ben al disvilup di chest percors; su cirche 16.000 metris cuadris il Parc comunâl dal Stele (istituît tal 2006) al è stât, in particolâr in chescj ultins agns, volût a fuart des aministrazions comunâls di Rivignan, Teor e Pucinie, cun azions miradis ae valorizazion e al mantigniment dal ambient naturâl, cul increment di infrastruturis e percors atrezâts par cualificâ la aree. Visitis vuidadis, ativitâts didatichis, pistis ciclabilis e pedonâls a completin une ufierte turistiche come pocjis.
IL PARC DI VILE OTTELIO_ Ma il teritori di Ariis nol finìs achì di mostrâ la sô bielece: a pôcs pas dal acuari di fat al è ancje il Parc di Vile Ottelio che, cu la sô storie secolâr, e je stade teatri di contesis e e je passade framieç di events tant che la presince di patriarcjis e dai Savorgnans. La vile origjinâl però, sdrumade dopo de costruzion de fuartece di Palme, e fo tornade a fâ sù come vile padronâl vendude tal XIX secul al cont Ottelio. No par chest però e à pierdût il so incjant di residence antighe plene di storie dute furlane. ■
Venusia Dominici