Sfuei Mensîl Furlan Indipendent
Archivi de Patrie

Missus: un an cui predis di Glesie Furlane. Il film documentari di Massimo Garlatti Costa

............


«Glesie Furlane e je stade il puest ideâl dulà che si podeve fevelâ di dut. Ancje par fâ ciertis sieltis che no jerin dutis in linie. Fin dal ’70, o vin scomençât a domandâ la Messe par furlan, ultimementri o vin tradusût il Messâl. Cumò, nus disin di Rome che o vevin di domandâ il permès». E ancjemò: «La cjarte dai dirits dal om e dîs che ducj i popui a son compagns, par lenghe, par filosofie di vite, par impostazion culturâl. Sedi te societât civîl e purtrop ancje in chê religjose, chei dirits a vegnin in pratiche sbeleâts». A son chestis peraulis di pre ‘Sef Cjargnel a fâ di vuide al trailer dal film documentari Missus, produsût de Raja Film, curât e diret dal regjist udinês Massimo Garlatti Costa.
Nol è dome un discors di glesiis e di predis in chest documentari. «La cuistion e je ancjemò plui grande, e e cjape dentri la identitât di un popul, cun dutis lis sôs carateristichis, sfumaduris, apartignincis. Preâ te tô lenghe, tant che scrivi, tabaiâ, discori, al è un dirit acuisît che al va tutelât. Tra lis robis che mi àn plui colpît di Glesie Furlane, zirant chest film, e je che i predis che le componevin e che le componin, a son une vore particolârs, rârs. A puartin la crôs di jessi predis: chê forsit dolorose di dovê fâ cetant, in tantis e tantis parochiis in maniere contemporanie – viodude la carence di vocazions -, e chê positive che e ten cont de lenghe, de culture e dal popul furlan».
Massimo Garlatti Costa al à passât un an liturgjic intîr dentri DI cheste realtât, vivint cui predis e cui fedêi, filmant situazions religjosis e no dome, in largje part dal Friûl: de Cjargne ae Basse furlane. Ce che al testemonie al è un berli di dolôr de bande de religjositât furlane, un at di denunzie pe sorevivence di dutis lis minorancis e une dimostrazion concrete di une fede che no mole par chestis causis. «Ur brusave e ur bruse il fûc dentri – al continue Garlatti Costa -. Int tant che pre Roman Michelot, Checo Placerean, Toni Beline, ‘Sef Cjargnel e ducj chei che a puartin indenant la cause furlane, religjose e no, si fasin vôs par dutis lis minorancis puaris dal mont. Chest film e je une istantanie di autenticitât, di passion che e unìs fede e amôr pe int, par dute chê int, in Europe a son uns 50 milions lis personis che e fevelin une lenghe minoritarie, che si cjate in cundizions similis.»
Come un salustri, nus à dit il regjist e antropolic, ven a stâi come une sclaride, un moment di grande luciditât inte massime debilece, precarietât, come la lûs fuarte pôc prime di murî. Cheste e je une otiche di tignî di cont. Ma Glesie Furlane no mûr e anzit e vîf in maniere intense, e lis ripresis lu dimostrin trop che no à intenzion di molâ. Un progjet che si zonte aes tantis publicazions, cunvignis, incuintris che e puarte indenant de dì de sô fondazion, intai agns ’70, sul sburt dal Concili Vatican II. Cumò, il film documentari al parteciparà a concors internazionâi dedicâts, e tra pôc a scomençaran lis presentazions in dut il Friûl. Une note a part e va ae musiche, ae colone sonore, che e met in vôs i cjants dal patrimoni sacri furlan cul Côr Rosas di Mont e cul Côr di Dalès. Altris informazions si puedin cjatâ lant tal sît www.missusfilm.it
✒ Alessio Screm
_______________________________________________________
LA origjin: une rapresentazion sacre di tradizion antighe
Il non dal film documentari si ispire a un particolâr cjant de tradizion musicâl furlane che al ven eseguît di timps lontans, in ocasion de Novene di Nadâl. Il Missus, un pas dal Vanzeli (Lc 1,26-38) che al conte de Anunziazion. L’agnul Gabriel al va li di Marie e i rivele la nassite di Jesù. Il test latin al tache in chest mût: Missus est Angelus Gabriel a Deo… (L’agnul Gabriel al è stât mandât di Diu…). E la prime peraule dal test i da il non ae Novene.
No dome un cjant, ma un drame sacri di origjin antighe, salacor de Ete di Mieç, come il Planctus Mariae, Visitatio Sepulchri, Resurrectio e Rappresentatio in Annunciatione beatae Mariae Virginis. Abolide la liturgjie aquileiese subit dopo il Concili di Trent, chest cjant, e al stes timp rapresentazion, nol è muart ma al à continuât a jessi scrit e cjantât. Tra i compositôrs che plui si son dedicâts a cheste forme musicâl, o ricuardìn G.B. Tomadini, Zorzi, Pecile, Comencini, Girardi, Candotti, J. Tomadini, Marzona, Franz, Cossetti, Foraboschi, Pigani, Trinko, Perosa, De Lorenzo, O. Rosso… E, in dì di vuê, Giuliano Fabbro cu la Nunziade.
Un patrimoni inestimabil che al sarès di studiâ in maniere aprofondide, dal moment che a mancjin studis dedicâts. Come che al dîs pre Romano Michelot: «Al displâs che in dì di vuê, ta chest mont frenetic, ancje chestis tradizions venerandis e splendidis a vegnin simpri plui butadis di bande e lassadis colâ. In non di ce? Di plui confusion e baldorie e vueit…». (Al. S.)

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +