MEDITANTLIS TAL SO CÛR. Une scuele sbalade

E je començade la scuele. Cul pulmin o a pît su la strade a passin i fruts; dal pulmin a cjalin cui vogluts fûr pal barcon; chei a pît ju compagne la mame o la none che a puartin une sporte di libris fats tant pal marcjât e pôc pe culture.
I agns a van sù e ogni volte che si vierzin lis scuelis si tenerìs il gno cûr; il pinsîr al cor svelt a cuant che o jeri frut e mi viôt: tune man la cartele e dentri il libri di leture e il silabari, la matite, la gome, la pene, un cuader a riis, un a cuadrets e i sîs colôr inte scjatule Giotto.
Pensant a chei timps, il cûr si jemple di nostalgjie e di rabie. No pues cjacarâ mâl dai mestris che mi àn volût ben, ma o conclût che, sedi mestris che fruts, o jerin vitimis di une scuele borghese, ideologjiche e alienant.
Intes elementârs no mi àn cjacarât une volte dai boscs, dai nemâi, dai lavôrs, de vite dal gno paîs e no àn vierte la bocje sore la storie locâl. A àn fat cun nô la piês robe che si pues inmagjinâ: la «damnatio memoriae», ignorâ, cancelâ la identitât dai furlans. Nus tiravin sù cu la esaltazion dai grancj e il sviliment dai piçui; nus inscuelavin par lassânus sotans dai forescj, distinâts come simpri a fâ i muradôrs e lis siervis, a preparâ la valîs par scjampâ dal Friûl.
Mi auguri che in curt inte «opera omnia» di pre Antoni a vegnin publicâts i siei editoriâi e articui sore la scuele; li, cun clarece e cence miezis misuris, lui al puntualize i disastris che la categorie dai mestris (e ancje dai predis) e à fat.
Lis conseguencis lis paìn une vore saladis fint in zornade di vuê. Ce tantis polemichis sul furlan inte scuele. Il gno pinsîr al è clâr: la culture furlane, lenghe comprendude, e à di sedi obligatorie par ducj, parcè che patrimoni dal lûc, de storie e de int. Se cuatri crets come lis Dolomitis, la Unesco ju proclame patrimoni universâl, e sarà tant di plui patrimoni inalienabil la culture di un popul. I nestris dirits e identitât no puedin jessi sotoponûts ni a sondagjos ni a referendum. A son e a son di salvâ; vonde. La Italie si prepare za a festegjâ la unitât. Mâl! Se dut al vignarà inmaneât par esaltâ une stupide unitarie uniformitât. I capos e i ministeris a àn il dovê di un lunc esâm di cussience par ricognossi i disastris cence fin provocâts di une ideologjiche pseudoculture. Di fat, in cent e cincuante agns di lote cence padin cuintri lis lenghis e i dialets popolârs al è sucedût un disastri epocâl che Pier Paolo Pasolini al spieghe une vore ben tai siei scrits.
La scuele di une volte no è servide par une liberazion integrâl; la scuele di cumò, se ponude sui slogans dal computer, tecniche e inglês, e servìs dome al marcjât e a preparâ i gnûfs sclâfs, analfabets laureâts.
Ce strade cjapâ? O stoi pensant a la scuele di Barbiane di don Lorenzo Milani e a la Pedagogjie dai tibiâts di Paulo Freire. E sarès la sielte obligade.
Sot dal barcon a passin i fruts par lâ a scuele… O cjali e mi sieri dentri di me: pal moment, no viôt grant risultât.
pre Tonin Cjapielâr