Sfuei Mensîl Furlan Indipendent
Archivi de Patrie

ATUALITÂT – INCHIESTE La scuele – 1. Materiâi didatics: risorse preziose pôc pandude

............

Cul mês di Setembar e torne a scomençâ la scuele, e cun jê ancje i progjets di insegnament in marilenghe. Ogni an tes scuelis de nestre regjon part des oris dal curricola scolastic e je risiervade al insegnament in marilenghe. I progjets a son difarents: si riferissin a varis argoments, a puedin vê durade divierse, a puedin doprâ il furlan tant che lenghe veicolâr… La lôr cualitât a dipent une vore dal insegnant che ju cree e che ju met in vore. Ducj i progjets però, come cualsisei altre materie che e ven insegnade, a àn un pont di partence comun: il materiâl didatic a disposizion dal insegnant.
MATERIÂL DISPES PÔC COGNOSSÛT_ Come che dispès al sucêt cuant che si cirin dâts sui materiâi realizâts in lenghe furlane, nol è simpri facil cjatâ fûr dutis lis informazions. E mancje une bancje di dâts in linie dulà podê cjatâ ducj i riferiments bibliografics che a coventin: un strument che al sarès dal sigûr util ancje pai docents. Se si cjale il gjenar di libris a disposizion, al salte subit al voli il fat che cierts tescj «fondamentâi» a mancjin, tant che une gramatiche par fruts, o la leterature pe infanzie. Cun dut achel, no si pues fevelâ di une carence di materiâi, soredut se si fâs il paragon cun altris minorancis talianis: pluitost, e je la distribuzion a mancjâ. «Dut al dipent di ce che si intint par materiâl didatic» e spieghe Laura Nicoloso, mestre te scuele di Bordan che zaromai di agns si ocupe di didatiche in marilenghe. «Materiâi a ‘nt son tancj: tocs di leterature e di teatri, tescj di cjançons, manifescj, cines, fumuts… Bisugne savêju doprâ. La scuele e je une realtât dinamiche, dulà che si pues praticâ la ricercje azion, dulà che il frut al è part ative: no si pues pensâ che par coinvolzilu al sei suficient dâi la fotocopie di «schedis», ven a stâi di materiâi prontâts di altris e bielzà struturâts, compagns par ducj. Bisugne capî i siei interès e savê doprâ i tancj materiâi che o vin».
IL PANORAME DES PUBLICAZIONS_ Libris a ‘nt son e e vâl le pene di fâ une carelade su ce che al è a disposizion. In gjenerâl si pues fâ une distinzion jenfri i materiâi di lavôr pai fruts e lis liniis vuide pai insegnants. Tal prin grup a son par esempli Tescj plui, i libris realizâts dal Osservatori pe Lenghe Furlane (OLF) zaromai une desene di agns indaûr, e distribuîts a dutis lis scuelis furlanis. Cinc volums bilengâi pensâts pe scuele primarie, sul model dai libris di test doprâts par solit tes elementârs. Po dopo, adun cul CIRF de Universitât dal Friûl, l’OLF al à produsût ancje – dome par fâ doi esemplis – Peraulis di chenti, un libri di test cun elements di storie, gjeografie, linguistiche e tradizions, une sorte di sussidiari che al somee però plui un libri di consultazion par grancj, che un strument di lavôr par fruts; e Tin, Gjovanin, l’Orsut e i Claps, une racuelte di pacuts didatics cuntun CD-rom interatîf pes scuelis elementârs. Tal secont grup no si puedin dismenteâ la dispense Un nivel soiâr, publicât zaromai tal 1987 par cure dal Dipartiment di Didatiche de Universitât, che al introduseve concets vuê fondamentâi pal insegnament des lenghis. Tal 2004 daspò, Olf e Universitât, in colaborazion cul Ufici Scolastic Regjonâl, a àn publicât lis Indicazions pe programazion didatiche curicolâr daûr de leç 482/99, un test tecnic par judâ i insegnants te progjetazion e te programazion didatiche. Di pôc, la Agjenzie Regjonâl pe Lenghe Furlane e à tornât a distribuî Cressi cun plui lenghis, une vuide par gjenitôrs e mestris su cemût imparâ e insegnâ plui lenghis.
SCJARIABII DE RÊT_ I ultins lavôrs in ordin di timp a son chei dal Consorzi Universitari dal Friûl (CUF). In gracie dai fonts statâi de Leç 482/99, il CUF al à publicât une schirie di materiâi pe scuele di base, disponibii a gratis daûr di une domande, o che si puedin adiriture discjariâ dal sît dal Ent (www.linguefvg.it). Il fin de iniziative al è chel di rispuindi ae dibisugne de scuele di vê materiâi dulà che il furlan al è doprât tant che lenghe veicolâr. Il Consorzi al à decidût di produsi materiâi leâts ae sfere des siencis, ancje cul obietîf di svicinâ i fruts a chestis materiis, in gracie di di un percors che al partìs de osservazion direte dal teritori, par rivâ a une cognossince complesse dal ambient furlan. I insegnants a àn cussì a disposizion libris di preistorie, di siencis, su la mont furlane, su la scuele te Ete di Mieç, di gjeologjie e di paleontologjie, e vie indevant.
Forsit il probleme plui grues, come che e marche ancje Laura Nicoloso, al è chel de distribuzion des publicazions in marilenghe. Dispès robis une vore validis no si cjatin, e a restin a disposizion di pôcs. Par risolvi chest probleme si varès di fâ un lavôr su plui fronts, che al cjapi dentri Ents publics, librariis e cjasis editoris, di mût di podê vê une scuele siore di publicazions che la incuriosissin, buine di doprâ tancj lengaçs, no dome la cjarte.
FEDERICA ANGELI

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +