MEDITANTLIS TAL SO CÛR. Tragjedie te informazion

Te polemiche buride fûr in chescj mês su la libertât di stampe e lis intercetazions, la prime domande che mi fâs e je se fin chê altre dì o jerin libars di scrivi e sore dut se o vevin une informazion onestementri peade a la nestre realtât.
O rispuidarès di no. Cheste opinion mi ven de esperience negative vude tal taramot dal 1976. In chei mês e agns i Comitâts des tendopolis a rapresentavin la anime dai taramotâts e lis publicazions ciclostiladis a jerin il spieli di ce che la int e pensave; dut però al restave sot il control dai adets di diestre e di çampe e ancje jo o jeri tignût di voli; no dome, ma nus devin cuintri; sindacâts e partîts no le vevin cun nô parcè che o jerin cu la int, e de int, lôr no podevin fidâsi parcè che no jere ancjemò intrupade. Sore di me al veglave ancje il voli suspietôs e malcontent dal Vescul e de curie.
Une libertât di stampe duncje, sopuartade e sore dut censurade: un zûc che al continue compagn e puntuâl ancje in zornade di vuê.
Ma il Friûl al à une altre tragjedie te informazion: dute chê int che scrivint par talian si proclame furlane. E a son tancj. Al continue ce che al è sucedût pe Universitât ai timps dal taramot: i partîts e i studiâts a jerin contraris a la universitât a Udin ma in public a presentavin chest fat come un ben prestigjôs pai nestris students. Cussì a son ducj chei che a scrivin par talian tal intent di salvâ il furlan. Comprendût il Sinodo udinês diocesan cuint.
La cjase di dute cheste int, sorestants inteletuâi e predis, no je in Friûl; e pues jessi a Triest, a Rome, tai camarins dai partîts, tes aulis de universitât, tes gnovis e vecjis ideologjiis, tai zûcs dal podê, tai ordins de Conference episcopâl, ma no je di culì.
O sai de censure dal podê dai partîts e de glesie, ma o pensi che l’inteletuâl furlan si autocensuri di bessôl e si fasi autogol par contentâ ideologjiis modis e parons forescj.
Jo o domandi par cheste tiere une informazion che e sedi scrite te mê lenghe, un inteletuâl che al à rumiade la storie e la gjeografie di culì, un gjornalist che al cîr la veretât, che al rispiete lis etniis e che al jude la int a madurâ.
E conte une storiute di Fedro che une bolp e veve cjatade une mascare e, dopo vêle voltade e zirade cu la talpe, e disè: «Ce tante aparince! ma no à çurviel». In Italie e je tante stampe cence çurviel; mi displâs se chest al sucêt ancje te informazion in Friûl.
Cjacarìn duncje di gjornalisim, di censure e di intercetazions par che il mâl nol pegjori, ma stin atents di no fâ un autogol pierdint la anime dal nestri popul.
pre Tonin Cjapielâr