Se al è un puest in Friûl dulà che la culture e je a fevele libare, dulà che si puedin viodi il miôr di poesie, art, sience e filosofie declinadis in marilenghe, chest al è il curtîl dai Colonos. Ancje chest an Avostanis, la rassegne d’Istât dal agriturisim di Vilecjace, e à riclamât nons di alt nivel dal panorame culturâl e artistic internazionâl. Dut cun pôcs bêcs e tant cerviel. Sì, parcè che i Colonos no son un «event» che si sglonfe e magari al tire dongje int une volte sole intun grant scjas di atenzion mediatiche, ma daspò nol lasse nuie di sé. A son un progjet: clâr tes ideis, definît tai siei cunfins, ambiziôs tai siei intindiments, che a son chei di meti dongje i ferments plui gnûfs de culture furlane, miôr se fate par furlan, cun tocs de plui evolude critiche filosofiche e sociâl sui timps che o vivìn. Il dut cuinçât cun spetacui e mostris, instalazions e musiche. Art totâl, le varessin clamade i futuriscj: ma no je dome art, al è un resonament globâl sul mont di vuê. Une societât dulà che fevelâ di «nuie di masse» (chest al jere il titul de rassegne di chest an) al è za fâ une forme di resistence viers dal pinsîr dominant, lant viers une dimension di «resistence umane» ai detams de globalizazion e dal consumisim.
Nuie di masse_ «Nuie di masse» inte societât di vuê al è un principi rivoluzionari, parcè che – tant che al à spiegât Philippe Daverio, il critic d’art e polemist che al condûs la trasmission «Passepartout» su Rai 3 – il sisteme dal cumierç mondiâl al è fondât sul stràs. Pacs e pacuts par imbalâ ogni robe – machinis di rotamâ ogni trê agns par fâ cressi il Prodot Interni Lort: cheste e je la realtât che si cjatìn devant e che dut câs la riflession filosofiche di grancj pensadôrs tant che Serge Latouche e smire a cambiâ in profonditât.
La cuistion dal mudament antropologjic e je une vore impuartante te economie de manifestazion: in cheste edizion e je stade frontade in plui ocasions. Il prin incuintri che le à tamesade al è stât «Un cataclismi antropologjic» cun Gigi Dall’Aglio e Francesco Geremia, fondât sul valôr di une profezie comun che e je stade puartade indevant di doi grancj furlans dal passât, Pasolini e David Maria Turoldo. Ducj i doi a fasevin atenzion massime al destin dai ultims e la lôr riflession e faseve viodi za tai agns ‘60 la grande contradizion jenfri ricjece di sachete e puaretât dal spirt. Simpri di contrast fra la miserie di îr e il benstâ di cumò al à fevelât Gian Paolo Gri inte sô riflession «La cjoche dal pan»: ven a stâi la pierdite di sens che la societât furlane e à vût daspò che il nivel di vite al è cressût dibot. La int daspò dal boom economic e soredut dal taramot e à dispierdût secui di cussience identitarie, di savê stâ al mont, di rapuart armonic cu la nature. E dut chest al è piês di une cjoche triste; parcè che di une cjoche di vin si torne di cà, de cjoche dal pan no si vuarìs.
La crisi de culture_ A mancul che une crisi penze tant che chê che o stin vivint no nus fasi tornâ savis. «La prime conseguence de crisi a son i tais barbars ae culture – nus spieghe il diretôr artistic Federico Rossi – che a metaran in zenoli un grum di realtâts di chest setôr». Une situazion che ancjemò no tocje i Colonos «parcè che o vin sponsors che ancjemò nus judin a crodi tal avignî ancje cun finanziaments publics ridots a mieçs. E la int chest an e je cressude invezit di calâ, tant che magari cussì no al è sucedût inaltrò». Il vêr probleme no son i bêçs ma lis ideis e l’afiet dal public: «viers dal 2000 – si vise Federico – o vin vût cualchi anade dulà che il preseament de int e la cualitât des propuestis si jerin un pôc sbassâts. Chê e je stade la nestre piçule crisi. Ma il nestri public d’in chê volte al è plen di atenzion e amôr pes nestris iniziativis». Iniziativis che, metint dongje Ida Vallerugo e Sergio Cecotti, Daverio e Gri cui plui impuartants artiscj furlans (Teatro Incerto , Stefano Montello, Ermes Ghirardini, Giovanni Maier) a continuin a jessi la scune des ideis plui gnovis di chel Friûl che al vûl cressi inte sô cussience critiche.
Walter Tomada
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +