Une dì o soi rivât tune cjase e la parone e steve cjalant fotografiis di famee; e veve in man une foto dal 1933: a jerin cjapâts so pari Milio, la mari Marie e sîs fruts; a mancjavin lis trê frutis; vot fîs in dut. Milio il pari, za a nûf agns al fo menât in Austrie su lis fornâs e daspò al passà in Baviere. Tornât cjase, al fo spedît a fâ trê agns di militâr sul Cjars; finît chel, si rangià metintsi cuntun cjaval a servizi de int. Ma il mistîr nol rindeve e al partì di gnûf pes fornâs; daspò al fasè il contadin. Marie, la mari, a nûf agns e jere in Baviere come fie di anime a servî tune famee; e lavorave dut il dì in cusine. Si sarès sposade a vincj agns.
Catine, une fie, e jere nassude malade; e sarès muarte a vincjetrê agns cul mâl di cûr. Vicendis di chei altris fîs: Meni al fasè dîs agns di Libie par vie de presonie e daspò si ‘nt lè su lis fornâs.
Bepo al provà l’infier in chest mont te ritirade de Russie; po al fasè l’emigrant in France e al ve lis sôs tribulazions.
Zuan al passà la vite a brustulîsi ancje lui su lis fornâs.
In cjase e jere miserie nere; dute la famee e steve in dôs stanziis di pît sù. A vevin il purcit e la vacjute. E conte Dele, une altre fie, che a lavavin la robe tal laip des gjalinis. Jê, ancjemò di grande e leve a durmî intal lodar dapît dai pîts di sô mari.
Lis trê sûrs che no son inte fotografie, si clamavin Sabadine, Luzie e Rose. Di piçulis a jerin simpri discolcis e cuntun misar vistidut. A saressin partidis a servî sui dodis agns: une in Sicilie e dôs a Bari. Duncje, viodude cheste compagnie e sintût de miserie di chei timps, subit o ai fat dentri di me il confront cu lis cjasis di vuê, nîts di lusso cun doi o trê bagns, dôs machinis tal garage, il pradesel inglês, l’ultin model di television e il frizer plen. Nol mancje nuie; anzit mi somee che a regnin dapardut massepassuderie e straçarie.
Al sarà ancje; ma di chest pinsirat mi soi, in part, subit ricrodût.
Prime di dut la esperience mi insegne che une famee no sta ben pe cjase che e à. O voi a cjatâ int contente in cjasis come cuadreluts, come che o cognòs personis in vilis di lusso ma cu la muart tal cûr. La ligrie, la armonie, il bonstâ no dipendin dome di cuatri mûrs o dal colôr des piastrelis. Par chest no si à di lassâsi inceâ de cjase, ni dal zardin ni dal tacuin. Scrutinìn invezit il cûr de nestre int.
Cjasis bielis! Ma ancje, ce tantis tragjediis segretis tes nestris fameis. Culì di nô e vîf int che no je lontane, par pinsîrs e fastidis, dai timps di Milio e di Marie. Anzit, lôr a vevin il curtîl e il borc par sbrocâsi e nô no vin ni chel ni chel.
Ancje par dut chest , tignìn in cjase e cjalìn ogni tant cualchi foto di famee dai timps di une volte; chestis fotos a saran par nô des mestris: nus palesaran il ben che o gjodìn, nus judaran a contentâsi, nus pandaran lis virtûts dai vons, nus daran sintiment; in plui, i vecjos midiant di lôr a continuaran a bati che la cjoche dal pan e je piês di chê dal vin. E ricuardìnsi che a cuatri pas di nô a puedin sedi une Sabadine, une Luzie, une Rose, une creature cence difese; o ancje Milio e Marie, un malât, un forest, un disocupât che a spietin confuart e jutori tal lôr travai e dolôr.
pre Tonin Cjapielâr
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +