ATUALITÂT. Mattiuzza «Naghena» di arint a Arabba

Furlans premiâts pe poesie al concors leterari dal stât talian Mendrànze, sabide ai 23 di Avost a  Arabba (Belun). La manifestazion e smire a segnalâ e a premiâ i poetis plui interessants dal univiers des lenghis minoritariis ricognossudis de leç di tutele 482/99 e de lenghe romance fevelade inte Svuizare orientâl: 170 i partecipants par 330 poesiis in concors. Maurizio Mattiuzza al à vinçût il secont premi “Nàghena de Arjent 2008” cu la liriche L’univiers intun prât. Il prin premi al è stât vinçut di Maria Natalia Iiriti, cuntun componiment in lenghe greche de Calabrie. Te sezion scuele, al à vinçût un frut di Bagnarie, Matteo Gaspardis («Il bielissim planfuart»).
Par Mattiuzza al è il secont ricognossiment impuartant in pôcs mês. Di fat, une altre sô poesie, Gli alberi di Argan, in lenghe taliane, e je rivade finaliste al concors internazionâl Arteinstrada di Colmurano, in provincie di Macerata. Tescj dai siei si cjatin in diviersis antologjiis, tant che Luce e notte (Lietocolle editôr), dongje di nons come il famôs poete beat american Jack Hirschman, e Plastic poetry party, une racuelte che e cjape dentri lavôrs in viers di cualchi grande firme de cjançon tant che Elisa, Neffa e Claudio Rocchi. Cualchi poesie di Mattiuzza e je stade ancje publicade di pôc su LiberiInversi.it e Absolutepoetry, considerâts tant che sîts web leteraris talians tra i plui autorevui. Un an une vore fis pal poete nassût in Svuizare, ma furlanon di Buri.
Maurizio, continus dal premi: un ricognossiment impuartant…
Sì, jo par solit no partecipi ai concors, ma mi sameave just sostignî un concors che al ponte su lis lenghis mancul pandudis. E je stade une grande partecipazion di autôrs di dutis 12 lis lenghis tuteladis de 482, a dimostrazion che une leterature in chest cjamp e esist e cun di plui e je vivarose. Pal numar e pe cualitât dai lavôrs, o soi une vore content dal gno risultât.
Cidin cidin, chest an tu stâs tirant dongje un grum di premis e tu publichis une vore…
Al è stât un an fortunât: a Macerata o ai partecipât parcè che il premi dal concors al jere la esposizion de poesie vie pes stradis dal borc de Ete di Mieç, sede dal concors. E jere une fieste di artiscj di strade, di fat. Une idee che o sint une vore dongje dal gno mût di interpretâ la poesie. In plui di chestis ocasions, o soi lât un grum ator cun readings di poesie.
Cemût ise cumò la situazion in Friûl pe poesie?
La situazion e je ferbinte, ancje a pet di altris bandis di Italie. A son autôrs, e in ocasion des manifestazion ancje cetant public: come che o disevi o ziri avonde par fâ leturis. Clâr che no si fevele di trops oceanics di int, ma in Friûl la situazion e je vivarose, sedi come scritôrs che come public. Di fat o pensi che in tantis ocasions, come la Fieste de Patrie (o magari la Fieste Ladine, ndr) si varès di coinvolzi di plui i poetis, parcè che e je une des arts plui ferbintis in Friûl, che e merte ricognossiment e promozion.
L’univiers intun prât
A je di argasie e teis
di fueis
la mîl dai dîs
che stoi vivint cun te che
tu mi dâs
il vert dai cjamps dopo des ploiis
l’aghe celeste da lis rois
tun daspomisdì d’istât
la vite, mi par, a je cheste
si cjatisi par câs e par amôr
si reste, si met
un clap daûr che l’altri
si plante un len
un omp seren l’è un omp
ch’a l’à platât
un toc dal so univiers ‘tun prât
Dree Venier