Sfuei Mensîl Furlan Indipendent
Archivi de Patrie

Premi Friûl 2007 pe Musiche

Martina Tubaro


Se e je vere che une des espressions plui inovativis de culture furlane contemporanie e je rapresentade de musiche, une part dal mert di cheste vivarositât e va dade al Premi Friûl di Radio Onde Furlane.
Di fat chest concors, puartât indenant di Radio Onde Furlane za sul finî dai agns ‘80, cun chê di dâ vôs a chei musiciscj che a sielzin la lenghe furlane par sunâ musichis modernis, al continue a jessi il spazi pes novitâts. Cun di plui che za di cualchi an l’artist vincidôr di chest concors al à la pussibilitât di regjistrâ un disc, che al va a zontâsi ae liste di titui presints tal catalic de etichete discografiche “Musiche Furlane Fuarte”, che e cjape dentri passe vincj produzions rock, punk, hip hop, eletroniche, indie rock e vie indenant. Al conferme la impuartance dal “Premi Friûl” il fat che nons tant che Arbe Garbe, Kosovni Odpadki, Silvia Michelotti, Pantan e Dlh Posse a son passâts ducj di cheste strade, dant un contribût fuart al disvilup de culture. I finaliscj a parteciparàn ae serade finâl dal vîf li che al si premiarà il vincidôr. La serade e sarà adun cun chê di “Musiche”, une sorte di vitrine des miôr produzions musicâls par furlan de ultime anade, sielzudis di un osservatori dai gjornaliscj di chenti,
che a daran la targhe “Deganutti” al vincidôr.
Il regolament
1. L’obietîf dal Premi Friûl al è chel di produsi oparis origjinâls che a àn chê di rignuvî e sperimentâ la forme cjançon in lenghe furlane e inta chês altris lenghis minorizadis dal Friûl cuntune atenzion particolâr aes tematichis e ai lengaçs dal dì di vuê.
2. Il concors al è viert a ducj, autôrs singui e grups, ai diviers gjenars musicâi e aes lôr contaminazions.
3. Par partecipâ, ogni grup o autôr singul al à di presentâ, dentri dai 30 di Otubar dal 2007, la regjistrazion di un sôl toc inedit (suntun supuart digjitâl). Si domande ancje il test scrit (edit o inedit).
4. Tra i tocs presentâts, la jurie e sielzarà di 3 a 6 grups o autôrs singui che a saran invidâts a partecipâ ae part finâl che e previôt un conciert curt, sui 15/20 minûts, che si tignarà dentri de rassegne “Musiche – pe gnove musiche furlane”, inmaneade dal Assessorât pe Culture dal Comun di Udin tal mês di Dicembar dal 2007.
5. Tra i grups o autôrs singui che a cjaparan part al conciert, la jurie e sielzarà un vincidôr.
6. Cui che al vinç al podarà regjistrâ un pôcs di tocs alì di un studi professionâl e di publicâju suntun cd, produsût de etichete Musiche Furlane Fuarte.
7. Il toc al va mandât intune buste sierade, adun cu la schede compilade che si cjate in chest bant, a: Radio Onde Furlane, Vie Volturno, 29 – 33100 Udin. Il materiâl presentât nol sarà tornât indaûr.
Par informazions e par domandâ il bant di concors si pues telefonâ al 0432.30614 o scrivi ae direzion di pueste eletroniche ondef@friul.it.


::::::::::::::::::::::::::::::::::::::::::::::::::::::::::::::::::::::::::::::::::::::::::


Il timp di Avostanis
“Avostanis dut l’an”: al podarès jessi chest il sproc de manifestazion organizade de associazion culturâl
“I colonos” e rivade ae edizion numar 16. Chest an il teme principâl al è stât il timp, il so cori e la sô influence su lis personis, la culture, il mût di viodi il mont. Il timp, duncje, cjalât cun prospetivis diviersis: la riflession filosofiche dal spetacul di danze contemporanie “Jessi”, il pont di viste matematic de discussion su “L’algoritmi dal timp” di Sergio Cecotti e dal retôr magnific de Universitât dal Friûl, Furio Honsell o il viaç te storie de filosofie par scuvierzi cemût che a viodevin il timp i filosofs, vuidâts dal professôr Gianni Vattimo. Ma chest an, Avostanis no à voie di fermâsi ae stagjon cjalde e la rassegne e va indenant ancje dopo de fin de Istât par continuâ la sô esplorazion ator de idee di “timp”.
IL TIMP PROTAGONIST_Il diretôr artistic de rassegne, Federico Rossi, al à pensât ben di continuâ il discors sul timp lant daûr da la scansion temporâl da lis “cuatri tempora”, ven a stâi lis zornadis dai solstizis e dai ecuinozis celebradis ancje de glesie catoliche. La calendarizazion no è altri che l’adatament cristian da lis fiestis di stagjon derivadis dal mont pagan: la racuelte dal forment, lis vendemis di sierade e il moment de semine. La rassegne Avostanis e devente itinerant e si sposte de tradizionâl sede di Vilecjaze di Listize par lâ a Cividât, Bertiûl, Ridicic di Sedean e Davâr. Lis sedis dai apontaments a son stadis sielzudis par scuvierzi lûcs di cult cuntun speciâl valôr artistic di valorizâ; si trate di piçulis gleseutis di campagne dulà che a son platâts tocs impuartants de nestre tradizion culturâl che no son mai stâts metûts in evidence.
SI TACHE DI CIVIDÂT_Si scomence ai 21 di Setembar, a Cividât, te glesie di Sant Blâs, cuntune serade dal titul “Il timp piturât”: Claudio Mattaloni, cu la consulence di Giuseppe Bergamini nus fasaran viazâ dentri de storie dal patrimoni artistic furlan par viodi cemût che al è cambiât il concet di stagjon vie pai agns. Doi mês dopo, ai 21 di Dicembar, si va te glesie di Sant Zuan a Ridicic di Sedean: Nicolino Borgo e Tito Maniacco si confrontaran, tra sacri e profan, sul significât di timp. Il timp di Diu e chel dal om, la esperience religjose e la prospetive secolâr. Il prin apontament dal an gnûf al è Davâr, ai 17 di Fevrâr, te glesie di Sant Martin di Guart.
TIMP E NÊF_L’abinament tra i cjants de tradizion locâl eseguidis da la corâl di “Rosas di Mont” e lis imagjins di Ulderica da Pozzo a fasaran rifleti suntune altre dimension dal timp, rapresentade dal misteri da la muart e intitulade “il timp da la nêf”. La rassegne si siere ai 16 di Mai a Bertiûl cuntune conference di Gian Paolo Gri sul mudâ dal timp e da lis tradizions te nestre regjon; il titul al è evocatîf e al podarès jessi benissim il titul de interie manifestazion: “O tempora, o mores!”
Simone Bressan

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +