Sfuei Mensîl Furlan Indipendent
Archivi de Patrie

Mancul retoriche e peraule ai zovins: cussì Pittaro al à volût la cunvigne dal sessantesim di EFNM

............

“Judaitnus a judâus!”: al è chest in struc il messaç che nus àn lassât i nestris emigrants tornâts chenti in ocasion de Diesime Cunvigne dai Furlans pal Mont, che si è davuelte a Udin ai prins di Avost. I furlans di inaltrò, che a àn cerçât tal forest ce che al vûl dî integrâsi e adatâsi a realtâts diferentis, a àn ufiert ai cunfradis de Patrie indicazions precisis su cemût vignî fûr de crisi. Il model al è propit il lôr: olsâ. Parcè che in chest moment il Friûl è al fer. La lôr lezion invezit e je chê de passion pal lavôr, de necessitât di impegnâsi no dome par se stes e pes lôr fameis ma ancje pe comunitât.
A cui che al à cjapât part ae Cunvigne di chest an i è stât clâr che il sproc al è stât mancul retoric dal solit. I va dât merit al president dal “Ente Friuli nel Mondo” Piero Pittaro di vê cirût di rignuvî la formule dant spazi a zovins çurviei di divignince furlane che a àn vût sucès tes tieris dulà che si son cjatâts a davuelzi il lôr lavôr. E al à rivât ancje a meti dongje lis tiercis e cuartis gjenerazions – chês che i lôr vons a son partîts pes Americhis za tal Votcent – ai gnûfs migrants de “gjenerazion zero” che a son partîts tai ultims vincj agns lant daûr ai trois segnâts de gnove economie globâl, su marcjâts gnûfs tant che la Cine o tornant in Australie, Americhe o vie pes Africhis.
E cussì si son podudis sintî storiis une vore interessantis. Plenis di passion, di voie di mostrâ che la crisi si bat cu la preparazion, cul sacrifici, cul imparâ dì par dì, a partî de scuele. “Insegnait l’inglês ai vuestris fîs” al à dit Roberto Bottega, furlan dal Sudafriche nassût tal 1970 a Johannesburg dulà che i nonos a jerin emigrâts tal 1950. Roberto al à fat il “trader” ae Borse di Londre par 12 agns, ma daspò si è lassât convinci dal pari a metisi tal “business” dal vin. E cumò al à trê gruessis aziendis dongje Capetown, e al cîr di fâ di puint jenfri Italie e Sudafriche par facilitâ la importazion tal paîs di Mandela di prodots de enogastronomie soredut furlane.
Al è partît di Gurize dome tal 2005 invezit Stefano Ritella, lauree ae Bocconi e tante voie di fâ, che al à fondât cun altris a Shangai un Fogolâr cussì atîf e braurôs tal pandi il “Furlan Pride” al pont di vê dissegnât maiutis une vore bielis che in tancj cinês a vuelin meti tant che at di simpatie pe int furlane. Int che ancje in Australie e gjolt di une considerazion une vore buine, cemût che al conferme Deris Marin, partît tal 1997 di Cjaurià e vuê a cjâf di un dai plui lontans Fogolârs Furlans, chel di Dimbulah tal Queensland.
Par rinfuarcî il leam tra i furlans di chenti e chei di inaltrò al è necessari – seont la zovine manager dal Rio Grande do Sul (dulà che i siei vons a son rivâts tal 1888) Vivian Beltrame – “che la Universitât e voledi cirî cun fuarce rapuarts cui ateneus forescj, e e sburti par slargjâ in dut il mont i butui di inovazion che e prodûs cu lis sôs ricercjis”. Stes resonament che al puarte indevant Matthew Melchior, che a 46 agns al è za president de Famee Furlane di Toronto, la plui grande de Americhe dal Nord. Un Fogolâr che za agns indaûr al à screât un progjet di ecelence creant un puint jenfri il Cro di Davian e il Princess Margaret Hospital, un dai plui modernis ospedâi dal mont. Obietîf: miorâ la cognossince par combati i tumôrs.
In cheste maniere, peantsi ai nestris cunfradis, o rivìn a miorâ la nestre vite. Ancje se sul rapuart cui cunfradis, Isabella Lenarduzzi – imprenditore di Bruxelles – e à vût alc ce dî: “no o vin simpri vude voie di tignîsi dongje al nestri Friûl, ma i furlans no àn simpri volût cirînus. Ogni famee e varès podût mandânus i fîs a imparâ lis lenghis alì di nô, ma tancj che a vevin fat fortune a àn preferît doprâ i bêçs comprant la Ferrari o lant aes Maldivis”. E cussì i zovins vuê in Friûl a riscjin di tornâ a jessi “libars di scugnî lâ”: e i 158 Fogolârs (154 atîfs e cuatri daûr a nassi in dut il mont, di Los Angeles a Brazzaville, dal Madagascar al Vietnam) si preparin a deventâ uficis di colocament. Za cumò a son centenârs lis domandis di zovins che a cirin lavôr e une oportunitât pal avignî, che in Friûl no si cjate. ❚
Walter Tomada

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +