Sfuei Mensîl Furlan Indipendent
Archivi de Patrie

MAF in corse, Friûl Diferent in riflession

............

Oris frenetichis di tratativis e riunions. I sherpa dal Maf, i delegâts teritoriâi, a son in azion jenfri listis e acuardis di firmâ. Ancje il “Moviment autonomist furlan” al corarà in chestis elezions aministrativis dai 25 di Mai. “Si presentarin scuasi in ducj i comuns, ma stin ancjemò tratant sul dulà e in ce forme. La che al sarà pussibil o cirarìn di lâ di bessôi, in alternative o strenzerin aleancis cun altris grops politics o listis civichis. Nissune preclusion, nancje sul colôr dai partîts. Dut al sarà leât a situazions puntuâls”, e sclarìs Valeria Grillo, la presidente. Plui che la politiche tal sens tradizionâl, al sarà prioritari il ben dal comun, la int, il puest, lis esigjencis dal teritori. La ex conseire provinciâl no nus à volût ancjemò anticipâ ni furnî i nons e i lûcs, stant che dut al è ancjemò in pîts. Sul program, invezit, si son definidis trê liniis di azion compagnis dapardut, gjenerâls. Un: lenghe furlane. “Pandi sul teritori la marilenghe e la sô culture, puartant indevant i progjets finalizâts ae tutele de identitât furlane”. Doi. No ae fusion jenfri i comuns. “O sin par mantignî lis specificitâts dai piçui, lis identitâts teritoriâls. Chest nol esclût che i servizis, invezit, a puedin ancje jessi consorziâts o organizâts in colaborazion fra plui ents”. Trê. Miôr gjestion economiche. “Vê pocjis risorsis, no vûl dî disperâsi: si puedin distès disvilupâ oportunitât e ocasions, cence vaî il muart. Un esempli? O pensi aes fameis in dificoltât che un comun al pues judâ e che a podaressin tornâ il jutori ricevût traviers di formis di volontariât a pro de comunitât”, e spieghe Grillo.
Par cualchidun che al cor, altris a son ferms. O miôr: “Tal mieç di une fase di confront”, a disin chei di “Friûl diferent”. Chest moviment al è in plene fase riflessive. “O stin pensant – al sclarìs un dai doi puartevôs, Luca Peresson – in ce maniere doprâ chel model che al è stât puartât indevant cu lis ultimis elezions regjonâls. E chest al valarà ancje pes europeanis. In ce maniere fâlu, dut câs, al è un discors dut di frontâ e sclarî. In chest moment no vin listis di “Friûl diferent” in pîts, ma la azion politiche e continue, si puartâ indevant il discors di sensibilizazion de int”. Aes Regjonâls dal 2013, il moviment al veve dât la poie a singui candidâts di altris listis. “O sostignìn – al dîs Peresson – une democrazie di prossimât, dulà che la rapresentance e sedi une vore peade ai aspiets des comunitâts e cuntune comunitât furlane une vore consapevule e cussiente des sôs problematichis. Vonde a une politiche viodude come un tirâsi fûr dal aspiet sociâl e di partecipazion. E à di tornâ tal mieç de int”. Cussì pes elezions europeanis. “Al è evident che une Europe che e sedi efetivementri Europe dai popui, che nô o crodìn, no à sens se no vedi presint realtâts come chês des minorancis linguistichis”. Cemût che “Friûl diferent” al intint fâ sintî lis vôs dai piçui popui a Strasburc al è ancjemò masse adore par capîlu. ❚
✒ Oscar Puntel

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +