Il Front Furlan si prepare pes aministrativis

Nissun leam, ni acuardi cui partîts politics nazionâi e tradizionâi, ma dome listis civichis. E la poie – e duncje l’ûs dal simbul – si darà dome a cui che al sot scrîf 8 ponts precîs. Chescj i prins cuatri: union di servizis traviers la agregazion di comuns, formazion di un sisteme di “Gjestion des tassis” alternatîf a Equitalia, zonis artesanâls e industriâls dai centris storics di cualificâ cun incentîfs, plans regoladôrs cence estensions. Il Front furlan al sta lavorant cun i sei 400 simpatizants sul teritori par jessi presint aes prossimi elezions aministrativis dai 25 di Mai.
I acuardis a son za stâts sierâts par i comuns di Puçûi, Cjastions di Strade e Mortean. “Dutis realtâts par nô za cognossudis– al fas savê il president dal Ff, Claudio Boaro – e che nus àn viodût in prime linie cuant che si tratât di bataiâ sul teritori cuintri scovaçârs o inceneridôrs”. Il Front furlan al puartarà ancje un gnûf mût di intindi la politiche, une cjosse che al ricuarde un pôc un altri Moviment: “Verifiche di mieç mandât, obligatorie par une cuistion di coerence e coretece cu la int. Une verifiche responsabile: se un assessôr no je fâs par cualsisedi motîf, si lu cjape e si lu met in panchine se no al ferme dute la scuadre”, al dîs Boaro. “E se si ves di vinci, cuant che si va a rinovâsi, mieze zonte e à di jessi cambiade cun conseîrs che a àn fat il praticantât intun mandât aministratîf precedent” Sêso i penta-stelâts in clâf zâl-blu? “Chestis robis noaltris o vin scomençât a pandilis tal 2006. Nô o sin i grilins autoctons, ma no cjapìn ordins di nissun: cuant che o viodìn alc di stramp sul teritori, si metin di traviers. No sin dome di proteste, o sin ancje di propueste”.
Il Ff, il so batisim eletorâl lu à za vût. Aes provinciâls, l’an passât al è stât la sorprese che nissun si spietave e al è rivât a mandâ a Palaç Belgrât, il cjâf liste, Federico Simeoni. Esperience che no i sta plasint: “O soi deludût”, nus à confidât. Partît in trombe, cun tantis ideis, pal vêr pôc si è let o sintût di ce che al à fat. (“Dut câs, o interven ancje 2, 3 voltis par sentade, ancje se po dopo no dut ce che si fâs al jes sui gjornâi”). A un an dal insediament, vuê al dîs che “chel ent di mieç nol covente a nuie. O doi at a Fontanin che al sta cirint di domandâ un so spazi, i sei dacuardi ancje sul fat di un ent che al rapresenti il Friûl. Ma nô i vevin dite di fâ une altre robe, che nol à fate e nol vûl fâle, presonîr cemût che al è dal sisteme dai partîts. Fontanin, vuelistu fâ sorevivi la provincie? Cjape ducj i comuns e disiur: dut ce che no fasês di bessôi, nô si metin al servizi vuestri e lu fassin. Cun cheste prospetive la provincie e pues lâ indevant. Ma lui, Fontanin, al fâs dome une bataie cuintri la regjon cence rivâ a nuie”.
Fontanin e Simeoni a disin ducj e doi di vê a cûr il Friûl. O olsi alore une domande: o sês sentâts a cualchi scagn l’un di chel altri. Vêso mai fevelât insiemit par viodi se alc si rive a fâ par chest benedet Friûl? “No, onestementri. Chest moment nol è ancjemò rivât, magari ancje par un limit nestri che o podaressin ancje scomençâ a superâ. Però ancje lui al è limitât dai partîts tradizionâi, che lu condizionin cetant”.
Cumò a rivaran ancje lis elezion europeanis. Intune altre interviste, simpri par chest sfuei, Simeoni nus veve anticipât che al jere in contat cun altris grups politics autonomiscj european. “Si sin sintûts cun chei di Slovenska Skupnost (formazion ative in F-VJ pe minorance slave) e ancje cu la European Free Alliance, fuarce politiche europeane dai moviments autonomiscj. O vin scandaiât la pussibilitât di creâ un cartel eletorâl e lôr nus àn rispuindût che a nivel di Nordest nol è in pîts ancjemò nuie. Duncje, alc si môf in cheste direzion. Noaltris o volin lavorâ tai rapuarts su lis minorancis rapresentadis inte nestre regjon e cirî i leams cun Slovenie e Austrie. O cjalìn plui ai rapuarts cul centri Europe che cu la Italie”. In cheste suaze, a metât di Avrîl, il Front furlan al fasarà cognossi ancje une iniziative: “O vin fat un ricors al Tar regjonâl, prontât dal senadôr Besostri cun chês altris minorancis linguistichis in Italie, ricors che al fâs un confront su tutele de leç 482 rispiet a normis europeanis. L’obietîf al è fâ ricognossi che no à di esisti dome une minorance linguistiche tutelade dal pont di viste eletorâl (che e sarès chê dal Sudtirôl), ma che chês altris minorancis a àn la stesse identiche dignitât e i stes dirits”. ❚
✒ Oscar Puntel